وفاقی حکومت نے سی سی پی او لاہور غلام محمد ڈوگر کو معطل کر دیا جس کا نوٹی فکیشن بھی جاری کردیا گیا ہے۔

تفصیلات کے مطابق وفاقی حکومت کی جانب سے سی سی پی او لاہور غلام محمد ڈوگر کی معطلی کا نوٹی فکیشن بھی جاری کردیا گیا ہے۔

وفاقی کی جانب سے جاری کردہ نوٹی فکیشن کے مطابق مزید احکامات کے آنے تک غلام محمد ڈوگر کی معطلی فوری نافذ العمل ہوگی۔

خیال رہے کہ وفاقی حکومت کی جانب سے سی سی پی او لاہور غلام محمود ڈوگر پر الزام لگایا گیا ہے کہ انہوں نے وزیر اعلی پنجاب کے احکامات کیوں مانے جب کہ ان پر مسلم لیگ ن کے رہنماوں پر مقدمات قائم کرنے کا بھی الزام تھا۔

دوسری جانب پنجاب حکومت کے ترجمان نے وفاق کے فیصلے پر ردعمل دیتے ہوئے کہا کہ سی سی پی او لاہور بہتر انداز میں اپنے فرائض انجام دے رہے ہیں اور ہم وفاقی حکومت کے احکامات کو نہیں مانتے۔

ادھر سابق وفاقی وزیر اطلاعات فواد چوہدری نے معاملے پر رد عمل دیتے ہوئے کہا کہ وفاقی حکومت صوبائی حکومت کے ماتحت افسر کو کس قانون کے تحت معطل کر سکتی ہے؟

فواد چوہدری نے کہا کہ اس نوٹی فیکیشن میں بھی کسی قانون کا حوالہ موجود نہیں ہے، یہ ملک قانون کے تحت چلانا ہو گا خواہشوں کے زیر اثر نہیں۔