سپریم کورٹ نےاداکارہ میشا شفیع کو کینیڈا سے بذریعہ وڈیو لنک جرح کی اجازت دینے سے متعلق تحریری حکم نامہ جاری کردیا۔

تفصیلات کے مطابق سپریم کورٹ میں گلوکارہ میشا شفیع کی جانب سےعلی ظفر کے خلاف جنسی ہراسانی سے متعلق کیس کی سماعت ہوئی۔

عدالتِ عظمٰی نے میشا شفیع کی کینیڈا سے بذریعہ وڈیو لنک جرح کی اجازت دیتے ہوئے درخواست منظور کرنے کا تحریری حکم نامہ جاری کر دیا۔

سپریم کورٹ نے حکم نامے میں کہا کہ میشا شفیع نے جنسی ہراسانی کیس میں کینیڈا میں مقیم ہونے پر بذریعہ وڈیو لنک جرح کی اجازت کی درخواست دائر کی، میشا شفیع 2016 سے کینیڈا میں مقیم، دو بچوں کی والدہ ہیں۔

عدالتی حکم نامے میں کہا گیا کہ میشا شفیع کو محض ایک بیان ریکارڈنگ کے لیے پاکستان آنے کی ضرورت نہیں۔ میشا شفیع کو جرح کے لیے کینیڈا میں پاکستانی ایمبیسی جانے کی بھی ضرورت نہیں۔ پچھلے 8 ماہ سے میشا شفیع سے جرح ہو رہی ہے۔

سپریم کورٹ نے کہا کہ بدقسمتی سے جرح میں تاخیری حربوں سے متاثرہ فریق پر دباو ڈال کر بیان بدلوانے کی کوشش کی جاتی ہے۔  جرح کے دوران جج کو خاموش تماشائی بن کر نہیں بیٹھنا چاہئے، جج اگر محسوس کرے کہ جرح کا حق غلط استعمال ہو رہا ہے تو اسے مداخلت کرنی چاہئے، میشا شفیع جنسی ہراسانی کیس میں ان کا بیان اہمیت کا حامل ہے۔

تحریری حکم نامے میں کہا گیا کہ عدالت میں بیان ریکارڈنگ کے لیےورچوئل موجودگی بھی کافی ہے۔ یہ بہترین وقت ہے کہ عدالتوں میں جدید ٹیکنالوجی کا استعمال شروع ہو۔

جسٹس منصورعلی شاہ نے حکم نامہ تحریر کیا۔