بنگلہ دیش کے آل راؤنڈر شکیب الحسن کو بھارت کے خلاف ون ڈے سیریز کے لیے اسکواڈ میں شامل کر لیا گیا ہے۔

تفصیلات کے مطابق شکیب الحسن بنگلہ دیش کے لیے ون ڈے اسکواڈ میں واپسی کریں گے جس کا اعلان جمعرات کو 16 رکنی اسکواڈ میں ہو گا جو اگلے ماہ بھارت کے خلاف ون ڈے سیریز میں حصہ لے گا۔

واضح رہے کہ شکیب الحسن نے بنگلہ دیش کی ویسٹ انڈیز اور زمبابوے کے خلاف آخری دو ون ڈے سیریز میں آرام کی غرض سے وقفہ لیا تھا۔

شکیب الحسن نے آسٹریلیا میں ہونے والے ٹی ٹوئنٹی ورلڈ کپ کے لیے قومی ٹیم کی قیادت کی تھی۔

بنگلہ دیش کے بلے باز نجم الحسین اور یاسر علی کی بھی ون ڈے ٹیم میں واپسی ہوئی ہے، جب کہ بلے باز مصدق حسین، اسپنر تیج الاسلام اور تیز رفتار بولر شرف الاسلام کو باہر رکھا گیا ہے۔

یاد رہے کہ بھارت 2015 کے بعد پہلی دو طرفہ سیریز کے لیے یکم دسمبر کو بنگلہ دیش پہنچے گا۔

پہلے دو ون ڈے 4 اور 7 دسمبر کو ڈھاکہ میں ہوں گے جبکہ تیسرا 10 دسمبر کو چٹاگانگ میں ہوگا جس کے بعد دونوں ٹیمیں دو ٹیسٹ کھیلیں گی۔

بھارت کے بنگلہ دیش کے آخری دورے کے دوران واحد ٹیسٹ بارش کی وجہ سے ڈرا ہوا تھا، جبکہ میزبان ٹیم نے اس سال کی ون ڈے سیریز 2-1 سے جیتی تھی۔