پی ٹی آئی کے رہنما ارسلان تاج  نے کہا ہے کہ کراچی میں 15 جنوری کو بلدیاتی الیکشن ہونگے۔

تفصیلات کےمطابق پاکستان تحریک انصاف کے رہنما ارسلان تاج نے میڈیا سے گفتگو کرتے ہوئے کہا کہ بلاول بھٹو کے بیرونی دوروں پر ایک ارب روپے خرچ کردیئے گئے۔

ارسلان تاج نے کہا کہ ملکی معاشی حالات بدترین ہو چکے ہیں، ملک کے حکمرانوں کی ترجیحات ملک کو ٹھیک کرنا نہیں ہے۔

انہوں نے یہ بھی کہا کہ ڈالر بے لگام ہو چکا ہے اور مِلک میں ڈالر مل بھی نہیں رہے ، مفتاح اسماعیل اور اسحاق ڈار کی آپسی لڑائی چل رہی ہے۔

ان کا کہنا تھا کہ ایم کیو ایم نے ذاتی مفاد کے تحت ہماری حکومت کو چھوڑا، ذاتی مفاد اور وزارتوں کے لئے انہوں نے سودے کئے۔

پی ٹی آئی کے رہنما نے کہا کہ عمران خان نے کہہ دیا ہے چوروں سے بات نہیں ہوگی اسمبلیاں تحلیل ہونگی۔

ارسلان تاج نے یہ بھی کہا کہ خورشید شاہ کو کیسز کے باوجود بیرون ملک جانے کی اجازت دے دی گئی ہے، عمران خان اس لئے کہتا ہے فوری الیکشن کرائو ملک بچاؤ۔

پاکستان تحریک انصاف کے رہنما ارسلان تاج نے مزید کہا کہ کراچی میں 15 جنوری کو بلدیاتی الیکشن ہونگے، الیکشن میں جیت کر میئر کراچی پی ٹی آئی کا ہوگا۔