فٹ بال کے سب سے بڑے ایونٹ میں پرتگال کے معروف اسٹرائیکر رونالڈو کو اہم میچز میں زیادہ تر وقت بنچ پر بٹھانے کی اصل وجہ سامنے آ گئی۔

غیر ملکی میڈیا کی رپورٹس کے مطابق ترکیہ کے صدر طیب اردگان نے انکشاف کیا ہے کہ پرتگال کے فٹ بالر کرسٹیانو رونالڈو کو فلسطین کی حمایت کرنے پر عتاب کا نشانہ بنایا گیا۔

طیب اردگان کا کہنا تھا کہ کرسٹیانو رونالڈو فلسطینی کاز کے لیے کھڑا ہونے والا شخص تھا اور ورلڈ کپ میں اسے سیاسی پابندی کا نشانہ بنایا گیا۔

واضح رہے کہ فیفا ورلڈ کپ جیسے اہم ترین ایونٹ میں شریک تمام ٹیموں نے گراؤنڈ پر اپنے بہترین کھلاڑیوں کو اتارا، لیکن پرتگال کے کوچ نے دنیا کے معروف ترین اسٹرائیکر کو میچز کے دوران زیادہ تر وقت بنچ پر بٹھایا۔

پرتگال کے کوچ کی اس حکمت عملی کو شائقین فٹ بال نے تنقید کا نشانہ بنایا، اور کہا کہ اپنے بہترین کھلاڑی کے کھیل سے فائدہ نہ اٹھانا بدقسمتی کے سوا کچھ بھی نہیں ہے۔

ترکیہ کے صدر اردگان نے اتوار کو مشرقی صوبہ ایرزورم میں نوجوانوں کی ایک تقریب سے خطاب کرتے ہوئے کہا کہ پرتگالی کوچ نے رونالڈو کو برباد کر دیا۔

طیب اردگان نے کہا کہ رونالڈو جیسے فٹبالر کو میچ میں صرف 30 منٹ باقی رہ کر پچ پر بھیجنے سے اس کی نفسیات خراب ہو گئی اور اس کی توانائی چھین لی گئی۔

یاد رہے کہ 37 سالہ رونالڈو مراکش کے خلاف ورلڈ کپ کوارٹر فائنل میں کھیل کے دوسرے ہاف میں متبادل کے طور پر آئے جس میں پرتگال کو 1-0 سے شکست کا سامنا کرنا پڑا۔

مراکش کے خلاف ہارنے کا مطلب یہ تھا کہ پانچ الگ الگ ورلڈ کپ میں گول کرنے والے واحد کھلاڑی رونالڈو کو اس سے باہر کر دیا گیا یہی وجہ ہے وہ اپنے آنسو روکنے سے قاصر تھے.

واضح رہے کہ کرسٹیانو رونالڈو نے کبھی بھی اسرائیل-فلسطین تنازعہ پر کوئی عوامی بیان جاری نہیں کیا لیکن اس کے باوجود کچھ رپورٹس اور تصاویر آن لائن وقتاً فوقتاً سامنے آتی رہتی ہیں، جن کی تصدیق بھی کبھی نہیں ہوئی۔

اس حوالے سے وسیع پیمانے پر ایک خبر گردش کرتی رہی ہے جس میں بتایا گیا کہ 2019 میں رونالڈو نے گولڈن بوٹ ایوارڈ کی انعامی رقم میں سے 1.5 ملین یورو فلسطین کو عطیہ کیے تھے۔

رونالڈ کی ایک تصویر بھی سوشل میڈیا پر کافی وائرل ہوئی تھی جس میں وہ ایک بینر کے ساتھ کھڑے ہیں جس پر ہسپانوی زبان میں ’فلسطینیوں کے ساتھ مل کر‘ لکھا ہوا ہے۔