انگلینڈ کے آل راؤنڈر لیام لیونگسٹون انجری کے باعث پاکستان کے خلاف ٹیسٹ سیریز سے باہر ہو گئے ہیں۔

تفصیلات کے مطابق انگلینڈ کے آل راؤنڈر لیام لیونگسٹون انجری کے باعث پاکستان کے ساتھ موجودہ ٹیسٹ سیریز سے مؤثر طریقے سے باہر ہو گئے ہیں۔

واضح رہے لیونگسٹون کو پہلے ٹیسٹ کے دوران اپنے دائیں گھٹنے پر چوٹ لگی تھی، لیونگسٹون کا یہ پہلا ٹیسٹ میچ تھا۔

آل راؤنڈر کو کھیل کے دوسرے دن باؤنڈری کے قریب فیلڈنگ کرتے ہوئے گھٹنے میں چوٹ لگی اور وہ پاکستان کی پہلی اننگز کے بقیہ حصے میں میدان سے باہر رہے۔ آل راؤنڈر انگلینڈ کی دوسری اننگ میں بیٹنگ کے لیے آئے، لیکن وہ شدید تکلیف میں مبتلا رہے۔

انہوں نے پہلی اننگز میں 9 اور دوسری میں ناقابل شکست 7 رنز بنائے۔ انہوں نے انگلینڈ کی جانب سے پنڈی ٹیسٹ میں بولنگ نہیں کی۔

انگلش کرکٹ بورڈ کے ترجمان کے مطابق لیام لیونگسٹون انگلینڈ واپس جائیں گے جہاں وہ بحالی پروگرام میں حصہ لیں گے، لیونگسٹون انگلش کرکٹ بورڈ اور لنکاشائر کی میڈیکل ٹیموں کی نگرانی میں اپنا علاج کرائیں گے۔

انگلینڈ نے ابھی تک متبادل کے بارے میں کوئی اعلان نہیں کیا ہے۔