گلستان جوہر میں پولیس نے نوجوان کو گھر میں گھس کر فائرنگ کرکے قتل کردیا۔

کراچی کے علاقے گلستان جوہر میں پولیس اشارے پر نہ رکنے پر اہلکاروں نے موٹرسائیکل سوار نوجوان کا تعاقب کرنے کے بعد گھر میں گھس کر فائرنگ کرکے قتل کردیا۔ پولیس کے مطابق ابتدائی تفتیش میں جرم ثابت ہونے پر تینوں پولیس اہلکاروں کو گرفتار کر لیا گیا ہے۔

پولیس کے مطابق موٹر سائیکل پر سوار دو افراد کو شاہین فورس کے اہلکاروں نے رکنے کا اشارہ کیا لیکن وہ نہیں رکا تو موٹرسائیکل پر سوار ہو کر اہلکاروں نے اس کا تعاقب کیا اور ایک رہائشی عمارت کے احاطے میں جاکر اس پر فائرنگ کردی۔

پولیس اہلکاروں کی فائرنگ سے عامر حسین نامی نوجوان عمارت کی سیڑھیوں پر چڑھتے ہوئے موقع پر جاں بحق ہوگیا تاہم موٹر سائیکل سوار دونوں افراد کے پاس سے اسلحہ برآمد نہیں ہوا۔

وزیراعلیٰ سندھ کا نوٹس

دوسری جانب وزیراعلیٰ سندھ سید مراد علی شاہ کا گلستان جوہر میں مبینہ پولیس فائرنگ میں نوجوان عامر حسین کی ہلاکت کا نوٹس لیتے ہوئے ایڈیشنل آئی جی کراچی سے واقع کی تفصیلات طلب کر لیں۔

 وزیراعلیٰ سندھ سید مراد علی شاہ نے مقتول نوجوان کے والد سے ہرطرح کا تعاون کرنے کی ہدایت کرتے ہوئے کہا کہ مقتول عامر حسین کے والدین کے ساتھ انصاف ہوگا۔

گلستان جوہر  میں پولیس کے ہاتھوں نوجوان کی ہلاکت پر ایس ایس پی ایسٹ رحیم شیرازی نے میڈیا سے گفتگو کرتے ہوئے کہا کہ اہلخانہ اگر ایف آئی آر درج کرانا چاہتے ہیں تو ہم درج کریں گے۔

ایس ایس پی ایسٹ کی گفتگو

ایس ایس پی ایسٹ کا کہنا تھا کہ غیرقانونی طور پر انسانی جان لینےو الے کو قانون کے کٹہرے میں کھڑا کریں گے، پولیس اہلکاروں کا موقف کمزور ہے وہ کہتے ہیں ہم نے رکنے کے کہا تو وہ رکا نہیں۔

 رحیم شیرازی نے کہا کہ پولیس والوں کا کہنا ہے کہ دو افراد میں سے ایک شخص مسلح تھا، وڈیو سے ثابت ہورہاہے کہ ساتھ ایک بچی بھی تھی، مقتول عامر جب بلڈنگ میں داخل ہوا تو پولیس والوں  سے کہا کہ آپ ایسا کیوں کر رہے ہیں، مقتول عامر نے کہا مجھ سے پوچھ گچھ کرلیں میں سرینڈر کرتاہوں۔

ایس ایس پی ایسٹ کا کہنا تھا کہ ایک انسانی جان گئی ہے جس کی تحقیقات کرنا ضروری ہے، مقتول کے ورثا قانونی کرناچاہتے ہیں جو ان کا حق ہے، مقتول کی والدہ ابھی اسپتال  گئی ہیں ان کی واپسی یہ تھانے جائیں گے۔