امریکہ میں این بی اے باسکٹ بال کورٹ میچ کے دوران میدان جنگ میں تبدیل ہو گئی، ریفری نے جھگڑا کرنے پر 11 کھلاڑیوں کو معطل کر دیا۔

تفصیلات کے مطابق امریکہ میں ڈیٹرائٹ کے لٹل سیزر ایرینا میں اورلینڈو میجک اور ڈیٹرائٹ پسٹنز کے درمیان ہونے والا باسکٹ بال میچ دنگل کے اکھاڑے میں تبدیل ہو گیا۔ جس کے بعد دونوں ٹیموں کے مجموعی طور پر 11 کھلاڑیوں کو معطل کر دیا گیا۔

میچ کے دوران ڈیٹرائٹ پسٹنز کے گارڈ کو حریف کھلاڑی نے دھکا دے کر کورٹ سے باہر کر دیا تھا۔

کھلاڑیوں کے مابین جھگڑا اس وقت شروع ہوا جب باسکٹ بال کے حصول کے لیے اورلینڈو میجک کے کھلاڑی مورڈز ویگنر نے ڈیٹرائٹ کے گارڈ کلیان ہیز کو دھکا دے کر کورٹ سے باہر دھکیل دیا۔

جواب میں اورلینڈو میجک کے مورٹز ویگنر کی گردن پر پسٹن کے کھلاڑی نے طیش میں آ کر مکا رسید کر دیا، جس کے بعد دونوں ٹیموں کے کھلاڑی آپس میں گتھم گتھا ہو ئے۔

جھگڑے کے وقت ڈیٹرائٹ پسٹنز کو اورلینڈ میجک پر 101 پوائنٹس کے مقابلے میں 121 پوائنٹس کی برتری حاصل تھی۔

دونوں ٹیموں کے کوچز اور دیگر عملے نے کھلاڑیوں کے درمیان ہونے والی اس ہاتھا پائی کو روکنے کی کوششیں کیں مگر وہ معاملے کو رفع دفع کرانے میں ناکام رہے۔

اورلینڈو میجک کے مورٹز ویگنر کو جمعرات کو پسٹن گارڈ کلیان ہیز کو کورٹ  سے باہر دھکیلنے پر دو گیمز کی پابندی عائد کر دی گئی۔

ریفری نے ڈیٹرائٹ پسٹن کے حمیدو ڈیالو سمیت اورلینڈو میجک کے 8 کھلاڑیوں پر ایک میچ کی پابندی عائد کر دی ہے۔

اورلینڈو میجک کے گارڈز کول انتھونی، آر جے ہیمپٹن، گیر ہیرس، کیون ہیرس، فارورڈز ایڈمرل شوفیلڈ، فرانز ویگنر اور سینٹرز کے کھلاڑی مو بامبا اور وینڈیل کارٹر جونئیر کو ایک ایک میچ کے لیے معطل کر دیا گیا ہے۔

اورلینڈو میجک کی ٹیم 8 کھلاڑیوں کی معطلی کے بعد مشکلات کا شکار ہو گئی ہے کیونکہ اب اگلے دو میچز کے لیے صرف 8 کھلاڑی ہی دستیاب ہوں گے.