سعودی عرب کی حکومت نے مسافروں پر آب زم زم لے جانے پر مکمل پابندی عائد کر دی ہے۔

تفصیلات کے مطابق جدہ ائیرپورٹ حکام نے اپنے ایک مراسلے میں پی آئی اے سمیت تمام پرائیوٹ ائیرلائینز کو متنبہ کیا ہے کہ مسافروں کے ساتھ آب زم زم لے جانے کی اجازت نہیں ہو گی۔

سعودی حکومت کے بیان کے مطابق عمرہ اور حج ویزہ کے حامل مسافروں کو ہی آب زم زم لانے کی اجازت ہے، اس کے علاوہ دیگر مسافروں کو آب زم زم ساتھ لے جانے کی اجازت نہیں ہو گی۔

عمرہ اور حج ویزے پر سعودی عرب آنے والے زائرین کو بھی صرف 5 لیٹر آب زم زم  کی ایک ہی بوتل لانے کی اجازت ہو گی۔

جدہ ائیرپورٹ حکام کے مراسلے میں بتایا گیا ہے کہ وزٹ ویزہ، بزنس ویزہ، سیاحتی ویزہ اور دیگر مقاصد کے لیے سعودیہ جانے والوں کو آب زم زم لانے کی اجازت نہیں ہو گئی۔

عمرہ اور حج زائرین کو کنگ عبداللہ بن عبدالعزیر زم زم واٹر پروجیکٹ کے تحت تیار کردہ بوتل میں ہی 5 لیٹر آب زم زم مہیا کی جائے گی۔

جدہ ائیرپورٹ حکام نے اپنے مراسلے میں تمام ائیر لائن کمپنیوں کو ہدایات جاری کی ہیں کہ ائیر لائن انتظامیہ مسافروں کے سامان کی چیکنگ کو یقینی بنائیں۔

مراسلے میں کہا گیا ہے کہ سعودی عرب سے پاکستان آنے والے مسافروں کی مکمل اسکریننگ کی جائے۔