ترجمان دفتر خارجہ نے کہا ہے کہ بھارت پاکستان میں ریاستی دہشت گردی میں ملوث ہے، عالمی برادری کو معاملے کا نوٹس لینا چاہیے۔

تفصیلات کے مطابق ترجمان دفتر خارجہ ممتاز زہرا بلوچ نے میڈیا سے گفتگو کرتے ہوئے کہا کہ پاکستان نے طویل عرصے تک دہشت گردی کا سامنا کیا، پاکستان میں دہشت گردوں کی کوئی محفوظ پناہ گاہیں نہیں ہیں۔

انہوں نے کہا کہ پاکستان میں بھارت ریاستی دہشت گردی میں ملوث ہے،عالمی برادری  اس معاملے کا نوٹس لے جبکہ پاکستان میں دہشت گردی میں ملوث قوتوں کے خلاف کارروائی بھی ہونی چاہیے۔

ممتاز زہرا بلوچ کا کہنا تھا کہ او آئی سی کے سیکرٹری جنرل 11اور 12 دسمبر کو پاکستان کا 2 روزہ دورہ کریں گے، اس دوران وہ وزیراعظم شہباز شریف، وزیر خارجہ بلاول بھٹو زرداری سے ملاقات اور آزاد کشمیر کا دورہ بھی کریں گے۔

ان یہ بھی کہنا تھا کہ پاکستان کا نام مذہبی آزادیوں کی فہرست میں شامل کرنے کے امریکی فیصلے پر مایوسی ہوئی جب کہ بھارت کو فہرست میں شامل نہ کرکے امتیازی سلوک کا مظاہرہ کیا گیا ہے۔

ترجمان دفتر خارجہ ممتاز زہرا بلوچ کا مزید کہنا تھا کہ بلائنڈ کرکٹ ٹیم کو بھارتی ویزے جاری نہ کرنا مایوس کن ہے، وزیر خارجہ بلاول بھٹو زرداری  بالی جمہوریت کانفرنس میں شرکت کے لیے انڈونیشیا کے دورے پر ہیں جب کہ وزیر خارجہ آج رات سنگاپور کے دورے پر روانہ ہوں گے۔