مراکش کے اسٹار فٹ بال حکیم زیچ بڑے کھلاڑی کے ساتھ بڑے دل کا مالک بھی ہے جس کی سخاوت اب دنیا بھر میں مشہور ہو چکی ہے۔

تفصیلات کے مطابق مراکش کے اسٹار فٹ بالر حکیم زیچ 2015 سے مراکش کی قومی ٹیم میں کھیل رہے ہیں اور انہوں نے اپنی قومی ٹیم سے ملنے والی تنخواہ کا ایک روپیہ بھی اپنی جیب میں نہیں رکھا۔

غیر ملکی میڈیا کے مطابق حکیم زیچ قومی ٹیم سے ملنے والی ساری تنخواہ ٹیم کے عملے اور اپنے آبائی علاقے مراکش میں غریب خاندانوں کو دے دیتے ہیں۔

اسی طرح ورلڈ کپ میں بھی ملنے والی تین لاکھ پچیس ہزار ڈالرز کی خطیر رقم بھی ضرورت مندوں میں تقسیم کر دی ہے۔

حکیم زیچ انسانیت کی فلاح و بہبود کے کاموں میں بھی بڑھ چڑھ کر حصہ لیتے ہیں، انہوں نے کینسر کے مریضوں کی مدد کرنے والی ایک مراکشی ایسوسی ایشن کو 1 لاکھ 85 ہزار یورو کا عطیہ دیا تھا۔

یہ عطیہ مڈ فیلڈر حکیم زیچ نے اپنی والدہ کے ساتھ جا کر دیا اور یہ کوئی تعجب کی بات نہیں ہے کہ زیچ نے کینسر کے خلاف جنگ میں اپنے عطیہ کے لیے ایک فنڈ کا انتخاب کیا کیونکہ دس سال کی عمر میں اسی بیماری کی وجہ سے اس نے اپنے والد کو کھو دیا اور اب وہ دوسرے لوگوں کی مدد کرنا چاہتا ہے۔

مشہور فٹ بال کلب ایجیکس کے سابق کھلاڑی لیون ڈی کوگل جو مالٹا میں ایک خوفناک کار حادثے کا شکار ہو کر فٹ بال سے دور ہو گئے تھے، انہیں وکیلوں کی ادائیگی کے لیے رقم کی ضرورت تھی ایسے میں حکیم زیچ نے ان کی بھی مالی امداد کی تھی۔

حکیم زیچ کی زندگی کے اس پوشیدہ راز سے پردہ اٹھ گیا ہے اب دیکھنا یہ ہے کہ اس بڑے دل کے بڑے کھلاڑی کو فٹ بال کے بڑے کلب اپنی ٹیم میں جگہ دے پاتے ہیں یا نہیں۔