قطر میں جاری فیفا ورلڈ کپ 2022 میں شائقین فٹ بال کی اسٹیڈیم میں آمد کا نیا عالمی ریکارڈ قائم ہو گیا ہے۔

تفصیلات کے مطابق قطرمیں جاری فیفا عالمی کپ میں فٹ بال ٹورنامنٹ کی تاریخ میں اب تک کی سب سے زیادہ حاضری ریکارڈ کی گئی ہے، اور مجموعی طور پرساڑھے24 لاکھ تماشائی میچز دیکھنے کے لیے آچکے ہیں۔

فیفا کی اپنے قطر 2022 پورٹل پرشائع ہونے والی ایک رپورٹ میں بتایا گیا ہے کہ 13دن اور 48 میچوں کے بعد مشرقِ وسطیٰ کے خطے میں ہونے والے ٹورنامنٹ کے پہلے ایڈیشن میں ریکارڈ ٹرن آؤٹ دیکھنے میں آیا ہے۔

اس ورلڈ کپ میں اوسطاً 96 فی صد شائقین اسٹیڈیم کی کرسیوں پرموجود پائے گئے ہیں جبکہ روس میں 2018 کے عالمی کپ کے دوران کل تماشائیوں کی تعداد21 لاکھ 70 ہزارریکارڈ کی گئی تھی۔

فیفا کے 1994 کے فٹ بال عالمی کپ کے فائنل کے بعد ٹورنامنٹ کی تاریخ میں اب تک کی شائقین کی سب سے زیادہ حاضری قطرکے لوسیل اسٹیڈیم میں دیکھی گئی جب 88،966 شائقین نے ارجنٹائن بمقابلہ میکسیکو کا گروپ میچ 26 نومبرکودیکھا۔

عالمی کپ کے اس ایڈیشن میں ایک اور دلچسپ عنصر یہ ہے کہ تمام براعظموں کی ٹیموں نے پہلی مرتبہ عالمی ٹورنامنٹ کے دوسرے مرحلے یعنی ناک آؤٹ 16 تک رسائی حاصل کی ہے۔

ایشیا بحرالکاہل کے خطے سے تعلق رکھنے والی تین ٹیمیں آسٹریلیا، جاپان اور جنوبی کوریا پہلی مرتبہ ناک آؤٹ مرحلے میں پہنچی ہیں یہ خود ایک ریکارڈ ہے۔

اس سے پہلے سنہ 2002  اور 2010 میں اس خطے کی صرف دو ٹیمیں فائنل 16 مرحلے میں پہنچی تھیں۔

یہ بات بھی قابل ذکر ہے کہ دو افریقی ٹیمیں سینیگال اورمراکش بھی ناک آؤٹ مرحلے میں پہنچ گئی ہیں۔ آخری مرتبہ 2014 میں براعظم افریقا کی دو ٹیمیں گروپ سولہ کے مرحلے میں پہنچنے میں کامیاب ہوئی تھیں۔

فیفا کے چیف آف گلوبل فٹ بال ڈیولپمنٹ آرسین وینجر نے ایک بیان میں کہا کہ گروپ مرحلے کے نتائج سے ظاہرہوتا ہے کہ زیادہ سے زیادہ ممالک نے اعلیٰ سطح پر مقابلہ کرنے کے لیے کس حد تک کامیابی حاصل کی ہے۔ا

آرسین وینجر نے کہا کہ یہ مخالف ٹیموں کی بہتر تیاری اور تجزیہ کا نتیجہ ہے،جو ٹیکنالوجی تک زیادہ مساوی رسائی کی عکاسی بھی ہے۔ یہ فیفا کی عالمی سطح پر فٹ بال کی مسابقت کو بڑھانے کی کوششوں کے عین مطابق ہے۔

یہ بات خاص طور پر قابلِ ذکر ہے کہ پرتگالی فٹ بالر کرسٹیانورونالڈو نے اس ٹورنامنٹ میں ایک منفردریکارڈ قائم کیا ہے اور وہ ورلڈ کپ کے پانچ ایڈیشنوں میں اسکور کرنے والے تاریخ کے پہلے کھلاڑی بن گئے ہیں۔

اسٹیفنی فریپارٹ نے بھی تاریخ رقم کی ہے اور وہ فیفا ورلڈکپ کے کسی میچ میں امپائرنگ کرنے والی پہلی خاتون بن گئی ہیں، انھوں نے نیوزابیک اورکیرن دیازمدینہ کے ساتھ مل کرمیچ کا چارج سنبھالا تھا۔اس طرح وہ فیفاعالمی کپ کے میچ میں ریفری بننے والی پہلی تین خواتیں ہیں۔

واضح رہے کہ قطرمیں فٹ بال عالمی کپ ٹورنامنٹ کا آغاز 20 نومبرکو ہوا تھا اور یہ 18 دسمبر تک جاری رہے گا۔