بھارت میں بلائنڈ ٹی ٹوئنٹی ورلڈ کپ 5 دسمبر سے شروع ہونے والا ہے اور بھارتی سفارتخانے نے ابھی تک گرین شرٹس کو ویزے جاری نہیں کئے۔

تفصیلات کے مطابق پاکستان کی بلائنڈ کرکٹ ٹیم کو 5 دسمبر تا 17 دسمبر تک ہونے والے بلائنڈ ٹی ٹوئنٹی ورلڈ کپ میں شرکت کرنی ہے لیکن بھارتی حکومت نے ابھی تک پاکستانی ٹیم کے ویزے جاری نہیں کئے۔

سی اے بی آئی کے صدر مہنتیش جی کے نے جمعرات کو اس کی تصدیق کی کہ پاکستان اور بھارت سات دسمبر کو سری فورٹ گراونڈ پر آمنے سامنے ہوں گے۔

ویزا جاری کرنے میں تاخیر کی وجہ سے پاکستانی ٹیم کی ورلڈ کپ میں شرکت مشکوک ہو گئی ہے۔

میڈیا رپورٹس کے مطابق اس ٹورنامنٹ میں شامل ہونے کیلئے ٹیموں کو چار دسمبر تک یہاں پہنچنا ہے ، لیکن پاکستان کی ٹیم کو اب تک اس کیلئے اجازت اور ویزا نہیں ملا ہے۔

مہنتیش جی کے نے میڈیا سے بات چیت میں کہا کہ ہم سبھی جانتے ہیں کہ پاکستان کے کرکٹ کھلاڑیوں کے لیے ویزا حاصل کرنا ایک چیلنج ہے ۔ وزارت خارجہ اس پر کام کررہا ہے اور ہمیں پورا بھروسہ ہے کہ انہیں ویزا مل جائے گا ۔

بلائنڈ ٹی ٹوینٹی ورلڈ کپ میں نیوزی لینڈ، ویسٹ انڈیز اور انگلینڈ کی ٹیمیں شرکت نہیں کررہی ہیں، جس سے 12 روزہ ٹورنامنٹ میں میزبان بھارت سمیت آسٹریلیا، جنوبی افریقہ ، نیپال ، سری لنکا اور بنگلہ دیش کی ٹیمیں اپنا ہنر دکھائیں گی ۔

ٹی ٹوئنٹی ورلڈ کپ کے میچز فریدآباد، دہلی، ممبئی، اندور اور بنگلور میں کھیلے جائیں گے ۔ فائنل میچ بنگلور میں ہوگا۔