مسلم لیگ (ق) کے صوبائی صدر چوہدری پرویز الہیٰ کا کہنا ہے کہ دہشت گرد آزادانہ حملے کر رہے ہیں اور سیاسی مخالفین کو قید کیا جارہا ہے۔

تفصیلات کے مطابق سابق وزیر اعلی پنجاب چوہدری پرویز الہی سے سابق مشیر وسیم خان بادوزئی سابق ایم پی اے چوہدری احسان الحق نے ملاقات کی جس میں سابق اراکین اسمبلی عمر عباس ڈھلوں عمر آفتاب  علی عباس اغا بھی شریک تھے۔ ملاقات میں ملکی سیاسی صورتحال ،امن  وامان کے امورپر بات چیت کی گئی۔

اس موقع پر سابق وزیراعلیٰ پنجاب کا کہنا تھا کہ دہشت گرد آزادانہ حملے کر رہے ہیں اور سیاسی مخالفین کو قید کیا جارہا ہے، حکمرانوں کو ملک کی فکر ہے نہ ہی عوام کی، حکومت کی ترجیح امن و امان کا قیام  نہیں بلکہ صرف  سیاسی انتقام ہے۔

انہوں نے کہا کہ وفاقی حکومت ہو یا نگران سیٹ اپ، سب کو صرف فکر ہے کہ عمران خان کو کیسے مائنس کرنا ہے، انتقام کا ایجنڈا رکھنے والے سن لیں عمران خان کا راستہ نہیں روکا جاسکتا، عوام ،عمران خان کے ساتھ کھڑے ہیں حکمران الیکشن میں مقابلہ کرلیں۔

چوہدری پرویز الہیٰ کا کہنا تھا کہ عمران خان ملک کے مقبول ترین لیڈر ہیں، پی ڈی ایم کی تیرہ جماعتیں بھی ملکر عمران خان کا مقابلہ نہیں کر سکتیں، پی ڈی ایم کی جماعتیں بلدیاتی انتخابات سے لیکر عام انتخابات کے ہر محاذ سے بھاگ رہی ہیں۔

انہوں نے کہا کہ نگران سیٹ اپ ایک ایک فائل ڈھونڈ کر ہمارے دور کے اقدامات کو منسوخ کرنے میں مصروف ہے،  نگران اڑھائی ماہ کے مہمان ہیں ان کے تمام غیر آئینی اقدامات ریکارڈ ہورہے ہیں، جو جو قانون سے تجاوز کر رہا ہے وہ قانون کے شکنجے میں آکر رہے گا۔