ٹیسٹ کرکٹر یاسر عرفات ای سی بی لیول 4 کوچنگ کورس مکمل کرنے والے پہلے پاکستانی ٹیسٹ کرکٹر بن گئے۔

تفصیلات کے مطابق پاکستان کے سابق ٹیسٹ کرکٹڑ یاسر عرفات جو 2007 میں ٹی ٹوئنٹی ورلڈ کپ کا حصہ تھے نے ای سی بی لیول 4 کوچنگ کورس کامیابی سے مکمل کر لیا ہے۔

سابق پاکستانی بولر یاسر عرفات انگلینڈ اینڈ ویلز کرکٹ بورڈ کی کوچنگ کا کورس مکمل کرنے والے پہلے پاکستانی ٹیسٹ کرکٹر ہیں۔

یاسر عرفات نے سماجی رابطے کی ویب سائٹ ٹوئٹر پر اپنے ذاتی سنگ میل کے بارے میں شیئر کیا اور پاکستان کرکٹ ایسوسی ایشن (پی سی اے) کی مدد اور ان کوچز کا شکریہ ادا کیا جنہوں نے ان کے مقصد تک پہنچنے میں اہم کردار ادا کیا۔

یاسر عرفات نے اپنے ٹوئٹ میں کہا کہ الحمداللہ میں نے اپنا ای سی بی لیول 4 کوچنگ کورس مکمل کر لیا ہے اور میں پی سی بی کی حمایت اور تمام کوچز کا بہت شکرگزار ہوں جنہوں نے مجھے یہ حاصل کرنے میں مدد کی۔

یاد رہے سابق فاسٹ بولر یاسر عرفات نے 11 ون ڈے، 13 ٹی ٹوئنٹی اور تین ٹیسٹ میں پاکستان کی نمائندگی کی اور ریٹائرمنٹ لینے کے بعد انگلینڈ چلے گئےتھے۔

یاسر عرفات برطانیہ میں مختلف ٹیموں کے کوچ کے طور پر کام کرتے رہے ہیں اور کچھ رپورٹس کے مطابق انہیں 2019 میں کوچنگ کی پیشکش کی گئی تھی لیکن یہ معاہدہ عمل میں نہیں آیا۔