لاہور ہائی کورٹ نے مقدمات کا ریکارڈ پیش نہ کرنے پر شہباز گل کی حفاظتی ضمانت میں 6 فروری تک توسیع کردی۔

تفصیلات کے مطابق لاہورہائیکورٹ کے جسٹس طارق سلیم شیخ نے شہباز گل کی ممکنہ گرفتاری کےخلاف درخواست کی تین مرتبہ سماعت کی۔

عدالتی حکم کے باوجود مقدمات کا ریکارڈ پیش نہ کرنے پرعدالت نے ایڈیشنل وفاقی سیکریٹری داخلہ پرسخت اظہار برہمی کیا، عدالت نے ریمارکس دیے واٹس ایپ کے دورمیں پانچ منٹ میں ساری معلومات لی جاسکتی ہیں، بار بار وقت لےکربدنیتی ظاہرکی گئی جو انتہائی افسوس ناک ہے۔

جسٹس طارق سلیم شیخ نے کہا کہ آئی جی کس کےماتحت ہے یہ آپ کےسوچنے کا مقام ہے۔ عدالت کا حکم اپنی جگہ اپنے عہدے کے تقدس کا کچھ تو خیال کریں۔ یرگھنٹے بعد اس رویہ کی وجہ سے عدالت لگانا پڑ رہی ہے۔

عدالت نے مقدمات کی تمام تفصیلات طلب کرتے ہوئے شہباز گل کی حفاظتی ضمانت میں 6 فروری تک توسیع کردی۔

شہباز گل کی میڈیا سے گفتگو

 سماعت کےبعد میڈیا سے گفتگو کرتے ہوئے شہباز گل نے کہاکہ بیرون سازش سے آنے والی حکومت انہی کےاشاروں پر چلے گی، عوامی جذبات کی ترجمانی کےلئے عوامی حکومت کا آنا ضروری ہے۔

رہنما تحریکِ انصاف نے کہا کہ فواد چوہدری کو سیاسی انتقام کا نشانہ بنایاگیا، یہ سیاسی گرفتاریاں ہیں ہم عدالتوں میں مقابلہ کریں گے۔اسلام آباد انتظامیہ سے گزارش ہے کہ فواد چوہدری کےخلاف کوئی غیرقانونی اقدام نہ کیاجائے۔