اراکینِ سندھ اسمبلی سعید آفریدی اور شاہنواز جدون نے عدالت میں بریت کی درخواست دائرکردی۔

تفصیلات کے مطابق پی ٹی آئی کے منحرف رکن رمیش کمار کے گھر کے باہر توڑ پھوڑ اور دھمکانے کے کیس میں رکن سندھ اسمبلی سعید آفریدی سٹی کورٹ کراچی میں پیش ہوئے۔

پولیس ایک بار پھر گواہوں کو پیش کرنے میں ناکام رہی، عدالت نے برہمی کا اظہار کرتے ہوئے آئندہ 19 جنوری کو گواہوں کو ہر صورت پیش کرنے کا حکم دے دیا۔

سعید آفریدی نے کہا کہ یہ کوئی کیس نہیں نہ ہی اس میں کوئی گواہ ہیں۔

وکیل شجاعت علی خان نے کہا کہ اگرگواہ ہوتے تو اب تک پیش کردیے جاتے۔

مقدمہ میں عدالت اراکین سعید آفریدی اور شاہ نواز جدون پر فرد جرم عائد کر چکی ہے۔

پولیس کے مطابق ملزمان نے رمیش کمار کے گھر کے باہر احتجاج کے دوران مبینہ طور پر توڑ پھوڑ کی اور دھمکیاں دیں۔ واقعہ کا مقدمہ 21 مارچ کو درج ہوا تھا۔

مقدمہ میں نامزد سعید آفریدی اور شاہنواز جدون نے بریت کی درخواست دائر کردی جس پر عدالت نے وکیل سرکار کو نوٹس جاری کردیا۔

بریت کی درخواست پر سماعت بھی 19 جنوری کو ہوگی۔