پنجاب اسمبلی اجلاس میں اپوزیشن کی جانب سے تمام ضابطے بھلا کر شدید ہنگامہ آرائی کی جارہی ہے۔

اسپیکر سبطین خان کی سربراہی میں پنجاب اسمبلی کا اجلاس جاری ہے جس میں اپوزیشن ارکان کی جانب سے شدید احتجاج اور ہنگامہ آرائی کی جارہی ہے اس دوران مسلم لیگ ن کے ارکان کی جانب سے پنجاب حکومت کے خلاف مسلسل نعرے لگائے گئے۔

اپوزیشن ارکان کا مطالبہ ہے کہ آج ہی اعتماد کا ووٹ لیا جائے، ایوان میں  ‘اعتماد کا ووٹ لو ‘ کے نعرے بھی لگائے گئے۔ اجلاس کے دوران پی ٹی آئی کے اراکین نے بھی اپوزیشن کے خلاف نعرے لگائے۔

یہ بھی پڑھیں؛ اپوزیشن کو شکست کا خوف، پنجاب اسمبلی میں ہنگامی آرائی

اپوزیشن ارکان  اسپیکر ڈائس کے سامنے جمع ہوگئے۔ حکومتی اراکین نے بھی نعروں کا بھرپور جواب دیا۔ ایوان میں مریم کے پاپا چور ہیں کے نعرے بھی گونجنے لگے۔

اسپیکر پنجاب اسمبلی نے کہا طاہر خلیل سندھو اور خواجہ سلمان رفیق اپنے اراکین کو پیچھے ہٹائیں جب کہ میں آٹھویں دفعہ کہہ رہا ہوں اپنی نشستوں پر تشریف رکھیں- وگرنہ مجھے رولز کے مطابق کارروائی کرنی پڑے گی۔

اسپیکر سبطین خان کا کہنا تھا کہ حکومت کو اعتماد کا ووٹ لینا ہے یا نہیں اس پر ہائی کورٹ کو فیصلہ کرنے دیں، اگر اعتماد کا ووٹ نہیں لیں گے تو حکومت میں نہیں رہیں گے، عدم اعتماد کی تحریک لے آئیں فیصلہ ہوجائے گا۔