بھارت میں ہونے والے فیلڈ ہاکی ورلڈ کپ 2023 کے فائنل میں ایک دلچسپ مقابلے کے بعد جرمنی نے دفاعی چمپئین بیلجیئم کو شکست دے دی۔

تفصیلات کے مطابق ایف آئی ایچ ہاکی مینز ورلڈ کپ 2023 کے فائنل میں جرمنی نے ایک دلچسپ اور سنسنی خیز مقابلے کے بعد بیلجیئم کو پنلٹی شوٹ آؤٹ پر 4-5 سے شکست دے کر عالمی چمپئین کا تاج اپنے سر سجا لیا۔

فائنل بھارت کے شہر بھونیشور کے کلنگا اسٹیڈیم میں کھیلا گیا، دفاعی چمپئین بیلجئیم نے گروپ مقابلے میں جرمنی کو 2 گول سے شکست دی تھی، لیکن فائنل میں جرمنی ان کے لیے لوہے کے چنے ثابت ہوئی۔

دونوں ٹیموں نے ابتدا سے ہی جارحانہ کھیل پیش کیا اور ایک دوسرے کے گول پر حملے کئے، مقررہ وقت میں میچ 3،3 گول سے برابر رہا، جس کے بعد پنالٹی شوٹ آؤٹ کا مرحلہ آیا۔

جرمنی نے اعصاب کی اس جنگ میں اپنے اعصاب کو قابو رکھا اور دفاعی چمپئین بیلجئیم کو 4 کے مقابلے میں 5 گول سے شکست دے کر عالمی اعزاز اپنے نام کیا۔

اس کامیابی کے بعد جرمنی کی ڈور رینکنگ میں بھی سرفہرست ہو گیا ہے۔

جرمنی کا یہ تیسرا عالمی اعزاز ہے اس سے قبل 2002 میں ملائیشیا میں آسٹریلیا کو شکست دے کر پہلا مرتبہ عالمی ہاکی کا حکمران بنا تھا، 2006 میں بھی جرمنی نے اپنی ہی سرزمین پر آسٹریلیا کو شکست دے کر اپنے اعزاز کا کامیاب دفاع کیا تھا۔

اس سے قبل دن میں ہالینڈ اور آسٹریلیا کانسی کے تمغے کے میچ میں آمنے سامنے ہوئے جس میں ہالینڈ کی نوجوانوں پر مشتمل نئی ٹیم نے آسٹریلیا کو 1 گول کے مقابلے میں 3 گول سے شکست دے کر ایونٹ میں تیسری پوزیشن حاصل کی۔