پنجاب اسمبلی کی تحلیل کے معاملے پر سابق وزیراعظم نوازشریف نے مولانا فضل الرحمان اور آصف زرداری سے رابطہ کیا ہے۔

وزیراعلی پنجاب چوہدری پرویز الہی کی جانب سے صوبائی اسمبلی تحلیل کرنے کی سمری پر دستخط کے بعد پاکستان مسلم لیگ ن کے قائداور سابق وزیراعظم نواز شریف نے پی ڈی ایم کے سربراہ مولانا فضل الرحمان اور سابق صدر آصف علی زرداری سے ٹیلیفونک رابطہ کیا ہے۔

ذرائع نے بتایا ہے کہ پی ڈی ایم کے تینوں رہنماوں نے پنجاب اسمبلی کی تحلیل پر مشاورت کی اور اس دوران آصف علی زرداری نے پنجاب اسمبلی کی تحلیل روکنے کے لئے عدالت سے رجوع کرنے کی تجویز دی ہے۔

یہ بھی پڑھیں؛ پرویز الہٰی نے پنجاب اسمبلی توڑنےکی سمری پر دستخط کردیے

مسلم لیگ (ن) کے قائد نواز شریف نے اس معاملے پر پی ڈی ایم کا سربراہی اجلاس فوری طور پر بلانے کی تجویز دے دی۔

اس سے قبل وزیراعلیٰ پنجاب چوہدری پرویز الہیٰ نے چیئرمین پی ٹی آئی عمران خان سے ملاقات کے دوران پنجاب اسمبلی تحلیل کرنے کی سمری پر دستخط کردیے اور پنجاب اسمبلی تحلیل کی ایڈوائس گورنر پنجاب کو بھجوا دی گئی۔

بعد ازاں ذرائع نے بتایا کہ گورنر پنجاب کو سمری موصول ہوگئی ہے اور وزیر اعلی کی پنجاب کی جانب سے اسمبلی تحلیل کی ایڈوائس پر گورنر پنجاب بلیغ الرحمان نے مسلم لیگ (ن) کی قیادت سے رابطہ کیا۔

ذرائع نے بتایا ہے کہ وزیراعلی کی ایڈوائس پر قانونی و آئینی پہلووں کا جائزہ لینے کے بعد گورنر پنجاب حتمی فیصلہ کریں گے۔