پاکستان سپر لیگ میں ممکنہ طور پر شرکت نہ کرنے والے غیر ملکی کھلاڑیوں کا فرنچائزز نے نعم البدل تلاش کر لیا ہے۔

تفصیلات کے مطابق پاکستان سپر لیگ میں شامل 6 فرنچائزز کے بعض غیر ملکی کھلاڑیوں جن کی پی ایس ایل 8 میں شرکت مشکوک تھی ان کی جگہ متبادل کھلاڑی ٹیم میں شامل کر لئے ہیں۔

آج ہونے والی ایک کانفرنس کال میں پاکستان سپر لیگ کی فرنچائزز نے مزید دو دو سپلیمنٹری کھلاڑیوں کو اپنے اسکواڈ میں شامل کیا۔

لاہور قلندرز کے پلاٹینم کیٹیگری میں شامل راشد خان قومی ڈیوٹی کے باعث ابتدائی تین میچز میں دستیاب نہیں ہوں گے، ان کی جگہ سیم بلنگز کو شامل کیا گیا ہے۔

اسلام آباد یونائیٹڈ نے رحمٰن اللہ گرباز اور ایلیکس ہیلز کی جگہ ٹائمل ملز اور گس ایٹکنسن کو اپنے اسکواڈ میں شامل کیا ہے، جبکہ رچرڈ گلیسن رامن پاؤل کی جگہ پشاور زلمی کا حصہ ہوں گے۔

ملتان سلطانز نے عارضی طور پر اظہارالحق کو موقع دیا ہے وہ ڈیوڈ ملر کی جگہ لیں گے، جبکہ ونندو ہسارانگا کی عدم دستیابی پر کوئٹہ گلیڈی ایٹرز نے کسی کھلاڑی کو لینا مناسب نہیں سمجھا۔

ڈائمنڈ کیٹیگری جیسن روئے اور اوڈین اسمتھ کی جگہ ڈیوائن پریٹوریئس اور ول جیکس کوئٹہ گلیڈی ایٹرز کا حصہ بنیں گے، جبکہ گولڈ کیٹیگری میں ملتان سلطانز نے ٹم ڈیوڈ اور عقیل حسین کے متبادل کا انتخاب نہیں کیا۔

انگلینڈ کے ہیری بروک کی جگہ جنوبی افریقہ کے شان ڈیڈزویل لاہور قلندرز میں شامل ہو گئے ہیں، نوان تھسارا کوئٹہ گلیڈی ایٹرز میں نوین الحق کی عدم دستیابی کا فائدہ اٹھائیں گے۔

متبادل عارضی کھلاڑیوں کی فہرست میں لاہور قلندرز نے جارڈن کاکس کی غیر موجودگی میں کوشال مینڈس کا انتخاب کیا ہے، وائن پارنیل ملتان سلطانز کے اسکواڈ میں عادل رشید کی جگہ لیں گے، جبکہ کراچی کنگز نے تبریز شمسی کی عدم موجودگی میں فیصل اکرم کو ٹیم میں شامل کیا ہے۔

پاکستان سپر لیگ میں جنوبی افریقہ اور ویسٹ انڈیز کے کھلاڑی 8 مارچ کے بعد فرنچائز کو دستیاب نہیں ہوں گے، ایلیکس ہیلز 26 فروری کو پاکستان پہنچ جائیں گے مگر دیگر انگلش کھلاڑی بنگلہ دیش کے ساتھ سیریز کی وجہ سے 26 فروری تا 14 مارچ تک پی ایس ایل 8 میں نظر نہیں آئیں گے۔

ونندو ہسارنگا 3 مارچ تک پی ایس ایل 8 کا حصہ ہوں ، انگلینڈ کے جارڈن کاکس انگلینڈ لائنز کی ڈیوٹی کی وجہ سے 21 فروری تک مصروف ہوں گے اور ملتان سلطان کو ٹم ڈیوڈ 3 مارچ کو جوائن کریں گے۔

پاکستان سپر لیگ کی فرنچائزز نے آج مزید دو سپلیمنٹری کھلاڑیوں کو اپنے اسکواڈ کا حصہ بنایا۔

احسن بھٹی کو لاہور قلندرز نے منتخب کیا، اسلام آباد یونائیٹڈ نے ٹام کرن اور ظفر گوہر ، جبکہ خرم شہزاد اور حارث سہیل کو پشاور زلمی نے بُک کیا۔

بین کٹنگ اور موسیٰ خان پر کراچی کنگز نے قبضہ جمایا، ملتان سلطانز کی نگاہیں عماد بٹ اور کیرون پولارڈ پر آ کر رک گئی، جبکہ کوئٹہ گلیڈی ایٹرز نے سعود شکیل اور قیس احمد کو اسکواڈ میں شامل کیا۔

پی ایس ایل کا آٹھواں ایڈیشن 13 فروری سے شروع ہوگا۔