چوپدری پرویزالٰہی کا کہنا ہے کہ قائد اعظم کے بعد عمران خان ہی سب سے بڑا اور ایماندار لیڈر ہے، اُن جیسا لیڈر کسی پارٹی میں نہیں ملے گا۔

وزیراعلٰی پنجاب چوہدری پرویز الٰہی نے کہا ہے کہ عمران خان کے ساتھیوں نے مثالی کردار ادا کیا ہے۔ کسی بھی پارٹی میں عمران خان جیسا لیڈر نہیں ملے گا۔ ان میں لیڈر کی تمام خوبیاں موجود ہیں۔ عمران خان کا ویژن بہت وسیع ہے۔

چودھری پرویز الٰہی نے کہا کہ عمران خان پاکستان کی کشتی ڈوبنے نہیں دے گا۔ عمران خان کی قیادت میں پاکستان کی ناؤ چلتی رہے گی اور بغیر چپوؤں کے بھی چلتی رہے گی۔ عمران خان نے نئے پاکستان کا خواب دیکھاہے، اسے کامیاب کریں گے۔

وزیراعلٰی پنجاب نے کہا کہ خرید وفروخت ن لیگ کی عادت ہے عمران خان کی ٹیم نے ثابت کیا ہے کہ وہ بکاؤ مال نہیں۔ عمران خان کے ویژن کو آگے لے کر بڑھ رہا ہوں، چوروں کو گھر تک محدود کردیا ہے۔ میں بھرپوراعتماد پرعمران خان، تحریک انصاف، ق لیگ، مجلس وحدت المسلمین، آزاد رکن بلال وڑائچ اور وکلا کی ٹیم کا تہہ دل سے شکریہ ادا کرتا ہوں۔

وزیراعلٰی پنجاب چوہدری پرویز الٰہی نے کہا کہ پنجاب اسمبلی کے ارکان کے حوصلے، جرأت اور خودداری کو سلام پیش کرتا ہوں۔  ہمارے ارکان اسمبلی نے کسی قسم کے دباؤ اور لالچ کو خاطر میں نہ لاتے ہوئے ضمیر کے مطابق فیصلہ کیا۔ پہلے دن سے کہہ رہا ہوں کہ گھبرانا نہیں ہے، ہمارے مخالفین گھبرا گئے ہیں اور لیٹ گئے ہیں۔

انھوں نے کہا کہ شہباز شریف کہتے ہیں کہ ہم مانگ کر پیسے لائے ہیں، یہ منگتے ہیں۔ شہباز شریف نے بحیثیت وزیراعظم بھیک مانگ کر پاکستان کی جگ ہنسائی کرائی۔ یہ قائد اعظم کی وراثت کے قابل نہیں۔ ن لیگ اور شریف خاندان کے لوگ جب پکڑے جاتے ہیں تو سب سے پہلے بیمار ہوجاتے ہیں۔ پاکستان سے باہر جاتے ہی ہشاش بشاش ہوجاتے ہیں۔

چودھری پرویز الٰہی کا کہنا تھا کہ وفاقی حکومت نے مہنگائی ڈبل کر دی ہے، آٹے کی قیمتیں آسمان پر پہنچا دی ہیں۔ ن لیگ والوں نے پچھلے ایک ماہ سے شور مچا رکھا تھا، سانحہ ماڈل ٹاؤن کا ملزم یہاں تماشا لگا کر بیٹھا تھا۔ ن لیگ والے اسلام آباد سے بارات لے کر آئے تھے،ان کی ڈولی بھی خالی ہو گئی اورجھولی بھی خالی ہو گئی۔ ن لیگ رائے ونڈ کے ایک کونے کی جماعت بن کر رہ گئی ہے۔

وزیراعلٰی پنجاب نے کہا کہ ن لیگ کے منہ کالے ہوگئے، یہ لیٹ کر واپس چلے گئے ہیں۔ ن لیگ نے تو بے چارے گورنر کو بھی نہیں چھوڑا اور اس کی عزت بھی خاک میں ملا دی۔ شکست کو دلیری سے تسلیم کیا جاتا ہے، ن لیگ والوں کی کوئی عزت نہیں، دلیر بنو شکست کو تسلیم کرو۔ ن لیگ کو صحیح طور پر سرپرائزملا ہے۔

چودھری پرویزالٰہی نے مذید کہا کہ حلقوں میں اتنے کام کروائیں گے کہ ن لیگ کا نام ختم ہو جائے گا۔ ہزاروں نوکریاں دے رہے ہیں۔  احساس پروگرام کو مزید آگے بڑھائیں گے۔ پاکستان تحریک انصاف اورمسلم لیگ قائداعظم کا اتحاد ناقابل تسخیر ہے اور انشاء اللہ ناقابل تسخیر رہے گا۔ انشاء اللہ عمران خان کی قیادت میں متحد ہو کر پنجاب کے عوام کی خدمت کرتے رہیں گے۔