رہنما تحریکِ انصاف عامر ڈوگر کا کہنا ہے کہ حکومت نے پارلیمنٹ کا مذاق اڑایا ہوا ہے، انھیں بھاگنے نہیں دیں گے۔ 

رہنما پاکستان تحریک انصاف عامر ڈوگر نے پی ٹی آئی ایم این ایزکے ہمراہ پارلیمنٹ ہاؤس کے باہرمیڈیا سے گفتگوکرتے ہوئے کہا کہ  آج ہم 45 ایم این ایز چیئرمین کی ہدایت پر جعلی اپوزیشن لیڈر کو ہٹانے کے لیے اسپیکر کے پاس آئے۔

عامر ڈوگرنے کہا کہ ہم سیاسی حکمت عملی کے تحت 45 ممبر قومی اسمبلی استعفے واپس لے رہے ہیں۔ اس حکومت نے پارلیمنٹ کا مذاق اڑایا ہوا ہے، رات کی تاریکی میں نوٹیفکیشن جاری کیا کہ قومی اسمبلی 4 دن کے لیے بند ہے۔

رہنما پی ٹی آئی عامرڈوگرنے کہا کہ ہم یہاں کھڑے ہیں، ان کو بھاگنے نہیں دیں گے۔ ہم نے اسپیکر کو ای میل کردی ہے، نیشنل اسمبلی کی ویب سائٹ پرای میل کردی ہے اور متعلقہ لوگوں کو واٹس ایپ بھی کردیا اور انھیں بتا دیا کہ 45 اراکین استعفے واپس لے رہے ہیں۔

عامر ڈوگر کا کہنا ہے کہ مارشل لاء کے دور میں بھی اس طرح اسمبلیاں بند نہیں ہوئیں، یہ ملک الیکشن کی طرف جارہا ہے ایسے میں بہت ضروری ہے موزوں اپوزیشن لیڈر بنایا جائے، ہم اب اسپیکر قومی اسمبلی کی رہائش گاہ جائیں گے۔

تحریکِ انصاف کے رہنما نے کہا کہ جنرل الیکشن تک انہیں بھاگنے نہیں دیں گے، ہماری جانب سے اپوزیشن لیڈر بنانا ناگزیرہے، ہم اسمبلی میں بیٹھنے نہیں جارہے۔ ہم اسمبلی میں صرف عدم اعتماد کے ووٹ کی کارروائی کو مکمل کرنے اور جعلی اپوزیشن لیڈر کو ہٹانے کے لیے جارہے ہیں۔

پی ٹی آئی ارکان اسمبلی کے ہمراہ پارلیمنٹ ہاؤس کے گیٹ کے باہراحتجاج کرتے ہوئے انھوں نے مذید کہا کہ کوئی شارٹ سرکٹ نہیں ہوا ، یہ جھوٹ بول رہے ہیں۔ یہ ان کی بوکھلاہٹ ہے، عمران خان نے ان کی نیندیں حرام کردی ہیں۔

اس سے قبل تحریکِ انصاف کے ارکان جب پارلیمنٹ ہاؤس کے باہر پہنچے تو عملے نے گیٹ بند کردیا۔ عامر ڈوگر نے سیکیورٹی گارڈ سے کہا کہ ہمیں اندر جانے کی اجازت دی جائے، یہاں کوئی مارشل لاء لگ گیا؟

سیکیورٹی گارڈ نے جواب دیا کہ اندر جانے کی اجازت نہیں ہمیں احکامات ملے ہیں۔

یہ بھی پڑھیں: منسٹرکالونی کے باہردھرنا