سندھ ہائی کورٹ نے سندھ میں بلدیاتی الیکشن رکوانے کی ایم کیوایم پاکستان کی درخواست مسترد کردی۔ 

تفصیلات کے مطابق الیکشن کمیشن کے نامکمل کورم اور اقدامات کی قانونی حیثیت کے معاملے میں عدالت نے کہا کہ الیکشن کمیشن کے کورم سے متعلق درخواست پر تفصیلی دلائل سن کر فیصلہ کیا جائے گا۔

حتمی فیصلہ ہونے تک بلدیاتی انتخابات روکنے سے متعلق ایم کیو ایم کی حکم امتناعی درخواست کی سماعت میں ایڈووکیٹ جنرل سندھ حسن اکبر، ایم کیو ایم وکیل طارق منصورعدالت میں پیش ہوئے۔

وکیل ایم کیو ایم نے دلائل دیے کہ نامکمل الیکشن کمیشن نے بلدیاتی الیکشن کا نوٹیفیکیشن جاری کیا تھا جوغیر قانونی ہے جس پر ایڈووکیٹ جنرل نے کہا کہ ایم کیو ایم کی الیکشن کمیشن کے کورم سے متعلق ایک درخواست پہلے مسترد ہوچکی ہے۔

 ایڈوکیٹ جنرل نے کہا کہ ایم کیو ایم نے سپریم کورٹ کے فیصلے پر عمل درآمد سے متعلق درخواست میں بھی بلدیاتی الیکشن رکوانے کی استدعا کی تھی۔ ایم کیو ایم کی دوسری درخواست بھی عدالت نے مسترد کردی تھی۔

بلدیاتی الیکشن رکوانے کی ایم کیو ایم پاکستان کی درخواست پر ایڈوکیٹ جنرل حسن اکبرنے دلائل دیتے ہوئے کہا کہ سندھ ہائی کورٹ کے 14 نومبر کے فیصلے کی روشنی میں فیصلہ کیا جائے۔ ایم کیو ایم پاکستان یہی مؤقف پہلے بھی عدالت کو بتا چکی ہے۔ ایم کیو ایم نے اس فیصلہ کو سپریم کورٹ میں بھی چیلنج نہیں کیا۔

حسن اکبر نے دلائل دیے کہ بار بار ایک جیسی درخواستیں مختلف بینچز کے سامنے دائر کی جاتی رہی ہیں۔ الیکشن کمیشن کے 29 اپریل 2022 کے نوٹیفیکیشن کو چیلنج کیا جارہا ہے۔ اس نوٹیفیکیشن کی قانونی حیثیت سے متعلق سندھ ہائی کورٹ فیصلہ دے چکی ہے۔

ایڈووکیٹ جنرل نے مذید کہا کہ اگر کسی نئے نوٹیفکیشن کو چیلنج کیا گیا ہے تو ترمیمی ٹائٹل یا نئی درخواست دائر کی جاتی، الیکشن کمیشن کے کورم کا معاملہ مشکوک بنانے کی کوشش کی جارہی ہے جس پر ایم کیو ایم پاکستان کے وکیل نے کہا کہ کورم سے متعلق عدالتی فیصلے آچکے ہیں۔

اے جی حسن اکبر نے جواب دیا کہ ایم کیو ایم کے وکیل کا مؤقف حقائق کے منافی ہے۔ اس پر وکیل ایم کیو ایم پاکستان نے کہا کہ  الیکشن کمیشن کے کورم پر الیکشن کے پہلے مرحلے پر بھی درخواست دائر کی تھی۔

جسٹس اقبال کلہوڑو نے ایم کیو ایم پاکستان کے وکیل سے کہا کہ آپ صرف جواب الجواب دیں اپنا کیس آپ پہلے بتاچکے ہیں جس پروکیل نے جواب دیا کہ میں اپنا کیس ہی بتارہا ہوں، کورم اہم معاملہ ہے۔

ایم کیو ایم پاکستان کے وکیل طارق منصور سےعدالت نے کہا کہ کیا آپ یہ چاہتے ہیں ہم پہلے مرحلہ کے الیکشن کو بھی غیر قانونی قرار دیں؟ آپ کو پورا ایک گھنٹہ دے چکے ہیں کل اب مزئد وہی باتیں مت دہرائیں۔

سندھ ہائی کورٹ نے بلدیاتی الیکشن رکوانے کی ایم کیو ایم پاکستان کی درخواست مسترد کرتے ہوئے کہا کہ الیکشن کمیشن کے کورم سے متعلق درخواست پر تفصیلی دلائل سن کر فیصلہ کیا جائے گا۔