نیوزی لینڈ نے دوسرے ون ڈے میچ میں پاکستان کو 79 رنز سے شکست دے کر سیریز میں واپسی کر لی ہے۔

تفصیلات کے مطابق کراچی کے نیشنل اسٹیڈیم میں کھیلے گئے سیریز کے دوسرے ون ڈے میچ میں پاکستان، نیوزی لینڈ کے 261 رنز کے تعاقب میں 182 رنز پر ڈھیر ہو گئی۔

پاکستان نے نیوزی لینڈ کے 261 رنز کے جواب میں بیٹنگ شروع کی تو دوسرے ہی اوور میں فخر زمان بغیر کوئی رن بنائے آؤٹ ہو گئے، 9 رنز کے مجموعی اسکور پر امام الحق بھی داغ مفارقت دے گئے۔

بابر اعظم اور محمد رضوان نے اسکور کو 64 رنز تک پہنچایا جس کے بعد رضوان بھی آؤٹ ہو گئے۔

بابر اعظم نے ایک اینڈ کو سنبھالے رکھا لیکن دوسرے اینڈ سے وکٹیں گرتی رہی، حارث سہیل 10، آغا سلمان 25، اسامہ میر 12 اور محمد وسیم نے 10 رنز بنائے۔

بابر اعظم نے 114 گیندوں پر 79 رنز بنائے انہیں سوڈھی کی گیند پر وکٹ کیپر ٹام لیتھم نے اسٹمپڈ آؤٹ کیا۔

پاکستان کی پوری ٹیم 43 اوورز میں 182 رنز بنا کر آؤٹ ہو گئی۔

نیوزی لینڈ کی جانب سے ٹم ساؤتھی نے 2 اور ایش سوڈھی نے 2 وکٹیں حاصل کیں۔

پاکستان اور نیوزی لینڈ کے مابین تین میچوں کی سیریز 1-1 سے برابر ہو گئی ہے، فیصلہ کن میچ 13 جنوری کو ہو گا۔