وزیراعظم شہباز شریف کا کہنا ہے کہ آئی ایم ایف معاہدے سے مزید مہنگائی ہوگی کیوں کہ ہمیں اس معاہدے کی وجہ سے مزید سخت فیصلے کرنا پڑیں گے۔ 

اسلام آباد میں وفاقی کابینہ کے ہمراہ پریس کانفرنس کرتے ہوئے وزیراعظم شہباز شریف نے کہا کہ آئی ایم ایف پروگرام کی تمام شرائط پوری کی گئی ہیں، آئی ایم ایف کے ساتھ مذاکرات حتمی مراحل میں ہیں، آئی ایم ایف کے ساتھ جلد معاملات طے پاجائیں گے۔

وزیراعظم نے کہا کہ آئی ایم ایف کے ساتھ تقریباً تمام شرائط پوری کرلی ہیں جس میں آئی ایم ایف نے کچھ سبسڈیز ختم کرنے کو کہا ہے اور کہا گیا ہے کہ غریب کو سبسڈی دیں۔

یہ بھی پڑھیں؛ آئی ایم ایف کی ایک اور شرط پوری 

وزیراعظم نے اعتراف کیا کہ آئی ایم ایف کے ساتھ معاہدے کے بعد کچھ مشکلات ضرور آئیں گی اور اس کے نیتجے میں مہنگائی بڑھے گی تاہم منی بجٹ میں کوشش کی گئی غریب پر بوجھ نہ پڑے۔

انہوں نے کہا کہ پاکستان کو مشکلات سے نکالنے کے لیے اجتماعی کوششیں کرنا ہوں گی، ایک دن آئے گا جب آئی ایم ایف کے بغیر پاکستان ترقی کرے گا۔

وفاقی کابینہ نے تفصیل سے کفایت شعاری کے اقدامات کا جائزہ لیا، حکومت نے کفایت شعاری کا آغاز خود سے کرنے کا فیصلہ کیا ہے، تمام وفاقی وزرا، وزرائے مملکت، معاونین خصوصی، مشیروں نے تنخواہ اور مراعات نہ لینے کا فیصلہ کیا ہے۔

وزیراعظم کا کہنا تھا کہ تمام وزراء بجلی، پانی، گیس، ٹیلی فون کے بل اپنی جیب سے ادا کریں گے۔ تمام وزراء سے لگژری گاڑیاں واپس لینے کا فیصلہ کیا ہے جب کہ غیر ملکی دوروں پر کابینہ ارکان فائیو سٹار ہوٹلز میں قیام نہیں کریں گے۔

شہباز شریف نے کہا کہ کابینہ نے جاری اخراجات میں 15 فیصد کمی کا فیصلہ کیا ہے۔ 2024 تک تمام پرتعیش اشیاء کی خریداری پر مکمل پابندی ہوگی، وزراء کو صرف ناگزیر غیر ملکی دوروں کی اجازت ہوگی جب کہ تمام وزراء اکانومی کلاس میں سفر کریں گے۔