بھارت کے سابق کھلاڑی اور معروف کمنٹیٹر آکاش چوپڑا نے کہا کہ اگر پاکستان نے ورلڈ کپ کا بائیکاٹ کیا تو اسے سنگین نتائج کا سامنا کرنا پڑ سکتا ہے۔

تفصیلات کے مطابق بھارت کے سابق کرکٹر اور ہندی زبان کے معروف کمنٹیٹر آکاش چوپڑا نے اپنی ایک ویڈیو میں کہا ہے کہ اگر پاکستان نے ورلڈ کپ کا بائیکاٹ کیا تو اس کے سنگین نتائج بھگتنا پڑیں گے۔

بورڈ آف کنٹرول فار کرکٹ ان انڈیا (بی سی سی آئی) نے واضح طور پر ایشیا کپ 2023 کے لیے پاکستان کا دورہ کرنے کی کسی بھی تجویز کو مسترد کر دیا ہے۔

ایشین کرکٹ کونسل (اے سی سی) نے ابھی تک حتمی فیصلے کا اعلان نہیں کیا ہے کیونکہ حال ہی میں بحرین میں ہونے والی میٹنگ میں تعطل برقرار ہے۔ فیصلہ مارچ تک ملتوی کر دیا گیا.

رپورٹس کے مطابق پی سی بی کی انتظامی کمیٹی کے سربراہ نجم سیٹھی نے کہا کہ اگر بھارت ایشیا کپ سے دستبردار ہوتا ہے تو پاکستان شو پیس ایونٹ کے لیے بھارت کا سفر نہیں کرے گا۔

آکاش چوپڑا نے یوٹیوب چینل پر پاکستان کا تمسخر اڑاتے ہوئے کہا کہ پاکستان ورلڈ کپ کھیلنے بھارت نہیں آئے گا، کیا پی سی بی اتنا بڑا فیصلہ کر سکتا ہے۔

آکاش چوپڑا نے کہا کہ میں آپ کو تحریری طور پر دے سکتا ہوں، چاہے ایشیا کپ ہو یا نہ ہو لیکن اس کی 120 فیصد گارنٹی ہے کہ پاکستان بھارت آئے گا اور ورلڈ کپ بھی کھیلے گا۔

آکاش چوپڑا نے مزید کہا کہ میری ذاتی رائے میں اگر پاکستان ورلڈ کپ کا بائیکاٹ کرتا ہے تو اس کے نتائج سنگین ہوں گے.

واضح رہے کہ ایشیا کپ بھارت میں ہونے والے آئی سی سی ون ڈے ورلڈ کپ سے عین قبل ستمبر میں پاکستان میں ہونے والا ہے۔

آکاش چوپڑا کے مطابق بھارتی کرکٹ بورڈ ایشین کرکٹ کونسل سے ایک روپیہ بھی نہیں لیتا اور وہ اپنے حصے کا پیسہ بھی اے سی سی کے ممبران میں تقسیم کر دیا جاتا ہے۔

بھارتی کمنٹیٹر کا کہنا تھا بھارت ایشین کرکٹ کونسل میں ایک بڑے بھائی کے طور پر شامل ہے، اور یہ بات طے ہے کہ بھارتی ٹیم پاکستان کا دورہ نہیں کرے گی۔