احتساب عدالت اسلام آباد نے سابق وزیراعظم شاہد خاقان عباسی اورعظمی عادل کے وارنٹ گرفتاری منسوخ کر دیے۔

تفصیلات کے مطابق احتساب عدالت اسلام آباد میں سابق وزیراعظم شاہد خاقان عباسی کے خلاف ایل این جی ریفرنس سے متعلق کیس کی سماعت ہوئی۔

جج ناصر جاوید رانا کی احتساب عدالت میں شاہد خاقان عباسی کے وکیل بیرسٹر ظفر اللّٰہ کی جانب سے وارنٹِ گرفتاری منسوخ کرنے کی درخواست دائر کی گئی۔

بیرسٹر ظفر اللّٰہ نے درخواست میں مؤقف اپنایا کہ شاہد خاقان عباسی عدالت آ رہے تھے، راستے میں تھے، انہیں عدالت پہنچنے میں کچھ تاخیر ہوئی۔

بیرسٹرظفر اللّٰہ نے اپنی درخواست میں یہ بھی کہا کہ شاہد خاقان عباسی کے وقت پر نہ پہنچ پانے پرعدالت نے وارنٹ جاری کر دیے۔

احتساب عدالت کے جج ناصر جاوید رانا نے بیرسٹر ظفر اللّٰہ کی درخواست منظور کرتے ہوئے شاہد خاقان عباسی اور عظمیٰ عادل کے وارنٹِ گرفتاری منسوخ کر دیے۔

اس سے قبل اسی احتساب عدالت نے آج ایل این جی ریفرنس میں رہنما مسلم لیگ ن شاہد خاقان عباسی اورعظمٰی عادل کے ناقابلِ ضمانت وارنٹِ گرفتاری جاری کیے تھے۔

احتساب عدالت کے جج ناصر جاوید رانا نے شاہد خاقان عباسی کی عدم پیشی پر ان کے ناقابلِ ضمانت وارنٹِ گرفتاری جاری کیے تھے۔