تھانہ مری میں درج مقدمے میں پیشی کے معاملے میں عدالت نے شیخ رشید کے راہداری ریمانڈ سے متعلق محفوظ فیصلہ سنا دیا۔ 

تفصیلات کے مطابق سابق وفاقی وزیر داخلہ شیخ رشید کے خلاف تھانہ مری میں درج مقدمے میں پیشی کے معاملے میں انھیں اڈیالہ جیل سے سیشن عدالت اسلام آباد لایا گیا۔

ڈسٹرکٹ اینڈ سیشن کورٹس اسلام آباد میں میں سماعت کے دوران وکیل علی بخاری نے کہا کہ شیخ رشید اس وقت حراست میں ہیں۔ راہداری ریمانڈ اور سفری ریمانڈ دو مختلف چیزیں ہیں۔ مری پولیس کی جانب سے راہداری ریمانڈ کی استدعا پہلے مسترد ہوچکی۔ شیخ رشید کہیں بھاگے نہیں جارہے، حراست میں ہیں۔

شیخ رشید کے راہداری ریمانڈ کی درخواست کی مخالفت

وکیل علی بخاری نے شیخ رشید کے راہداری ریمانڈ کی درخواست کی مخالفت کرتے ہوئے مؤقف پیش کیا کہ مری پولیس کی مدعیت میں مقدمہ درج ہوا۔ جس کی مدعیت میں مقدمہ درج ہو وہ تفتیش نہیں کرسکتا۔ شیخ رشید کے گھرپردھاوا بولا گیا، آئین انسانی حقوق فراہم کرتاہے

وکیل علی بخاری نے مؤقف اپنایا کہ شیخ رشید کی جانب سے سولہ باروزیر رہنے کے بیان سے کس کو خطرہ ہوگیا؟ متعلقہ جوڈیشل مجسٹریٹ چھٹی پرہیں، مری پولیس کل بھی راہداری ریمانڈ کی استدعا کرسکتی تھی۔

وکیل شیخ رشید نے کہا کہ کیا ہوم سیکریٹری لاہور، ڈی سی راولپنڈی یا متعلقہ انتظامیہ کو گرفتاری سے آگاہ کیاگیا؟ شیخ رشید کے گھر سے سب کچھ برآمد کرلیا، پھر راہداری ریمانڈ کیوں چاہیے؟

جوڈیشل مجسٹریٹ نے استفسار کیا کہ راہداری ریمانڈ مسترد ہونے کے فیصلے کی کاپی ہے؟ جس پرمی پولیس نے جواب دیا کہ کوئی فیصلہ جاری نہیں ہوا، زبانی کلامی بات ہوئی۔

شیخ رشید نے کہا کہ میری تھانہ مری میں درج مقدمے میں پیشی ہو چکی ہے۔ مجھ سے جیل میں تھانہ مری میں درج مقدمے میں تفتیش ہو چکی ہے۔

’’موت میری محبوبہ، ہتھکڑی میرا زیور اور جیل میرا سسرال ہے‘‘

پراسیکوٹرعدنان نے شیخ رشید کے راہداری ریمانڈ سے متعلق دلائل میں کہا کہ آپ کی عدالت سے صرف راہداری ریمانڈ کے حوالے سے معاملہ آیا ہے۔ شیخ رشید جوڈیشل ریمانڈ پرہیں، شیخ رشید کو مری کی عدالت میں پیش کرنا ہے۔ شیخ رشید کے وکیل نے کہا کہ آپ راہداری ریمانڈ کی درخواست پر دلائل نہیں سن سکتیں۔

وکیل علی بخاری نے کہا کہ میں نے کہا کہ شیخ رشید کے راہداری ریمانڈ پر فیصلہ متعلقہ عدالت پہلے ہی سنا چکی ہے۔

شیخ رشید کے وکیل نعیم پنجوتھا نے دلائل دیے کہ شیخ رشید پر مقدمہ صرف ایک کہانی بنانے کے لیے درج کی گئی، شیخ رشید کو سیاسی انتقام کا نشانہ بنانے کے لیے مقدمہ درج کیاگیا، شیخ رشید پر ایک ہی نوعیت کی لسبیلہ اور کراچی میں بھی مقدمہ درج کیاگیا۔

وکیل شیخ رشید نے کہا کہ شیخ رشید کو صرف دماغی طور پر ٹارچر کرنے کی کوشش کی جارہی، شیخ رشید پر پریشر ڈالا جارہاتاکہ وہ اپنا بیان تبدیل کرلیں۔ شیخ رشید کی جان کو خطرہ ہے، جان چلی گئی تو کون ذمے دار ہوگا؟ عدالت اس بات کی یقین دہانی کروائے کہ شیخ رشید کی جان کو نقصان نہیں ہوگا۔

جوڈیشل مجسٹریٹ نے محفوظ فیصلہ سناتے ہوئے شیخ رشید کو ایک روزہ راہداری ریمانڈ پر مری پولیس کے حوالے کرتے ہوئے شیخ رشید کو کل دن دو بجے متعلقہ عدالت میں پیش کرنے کا حکم دیا۔

مری پولیس شیخ رشید کو ایف ایٹ کچہری سے لے کر روانہ ہوگئی۔