پاکستان کرکٹ بورڈ نے آج پاکستان سپر لیگ سیزن 8 کے لیے میچ آفیشلز کا اعلان کر دیا ہے۔

تفصیلات کے مطابق پی سی بی نے پی ایس ایل 8 کے لیے آج میچ آفیشلز کا اعلان کر دیا ہے جو 13 فروری سے 19 مارچ تک پاکستان کے چار مقامات پر منعقد ہوں گے۔

ملتان اور کراچی میں لیگ کے میچز 13 سے 26 فروری تک ہوں گے، جس کے بعد ایکشن لاہور اور راولپنڈی منتقل ہوگا جہاں 26 فروری سے 19 مارچ تک 20 میچز کھیلے جائیں گے۔

آئی سی سی کے ایلیٹ پینل آف امپائرز کے تین ممبران علیم ڈار، رچرڈ ایلنگ ورتھ اور مائیکل گف کے ساتھ احسن رضا، آصف یعقوب، راشد ریاض، فیصل خان آفریدی، مارٹن سیگرز، روچیرا پالیا گروگے، ایلکس وارف اور شوزب رضا ہوں گے۔

ایلیٹ پینل آف امپائرز کو محمد آصف، ناصر حسین اور طارق رشید سپورٹ کریں گے جو فورتھ امپائر کے کردار میں شامل ہوں گے۔

آئی سی سی کے ایلیٹ پینل آف میچ ریفریز کے سابق ممبر روشن مہاناما لگاتار آٹھویں سال واپس آئیں گے اور پانچ میچ ریفریز کی ٹیم کی قیادت کریں گے جن میں علی نقوی، افتخار احمد، جاوید ملک اور محمد انیس شامل ہیں۔

انگلینڈ کے لیے 13 ون ڈے کھیلنے والے وارف اور انگلینڈ کے لیے تین ٹیسٹ میچز کھیلنے والے سیگرز سری لنکا کے پالیا گروگے کے ساتھ آئی سی سی کے انٹرنیشنل پینل آف امپائرز کے ممبرز ہوں گے۔

ایچ بی ایل پی ایس ایل میں گف کی چوتھی شرکت ہوگی، جبکہ یہ ایلنگ ورتھ کی چھٹی ایچ بی ایل پی ایس ایل ہوگی۔

ملتان میں دفاعی چیمپئن لاہور قلندرز اور ملتان سلطانز کے درمیان ہونے والے افتتاحی میچ میں آصف یعقوب اور مارٹن سیگرز امپائرنگ کریں گے جبکہ فیصل آفریدی تھرڈ امپائر اور شوزب رضا فورتھ امپائر ہوں گے۔ محمد انیس میچ ریفری ہوں گے۔

علی نقوی 14 فروری کو کراچی میں کراچی کنگز بمقابلہ پشاور زلمی کے میچ میں پلےنگ کنٹرول ٹیم کی قیادت کریں گے۔ احسن رضا اور انگلینڈ کے ایلکس وارف آن فیلڈ امپائر، روچیرا پالیا گروگے تھرڈ امپائر اور طارق رشید فورتھ امپائر ہوں گے۔