ترجمان دفتر خارجہ کے مطابق پاکستان نے تباہ کن زلزلے کے بعد ترکیہ کے ساتھ یکجہتی کا اظہار کیا ہے۔

دفتر خارجہ سے جاری ہونے والے بیان میں ترجمان نے کہا کہ پاکستانی حکومت، عوام کو جنوبی ترکیہ میں تباہ کن زلزلے پر گہرا دکھ، شدید صدمہ ہے، وزیراعظم محمد شہباز شریف نے ترک صدر رجب طیب اردوان سے ٹیلی فونک رابطہ کیا، وزیراعظم نے المناک جانی نقصان پر برادر ترک عوام سے دلی تعزیت کا اظہار کیا۔

ترجمان دفتر خارجہ  کا کہنا تھا کہ وزیراعظم محمد شہباز شریف نے امدادی سرگرمیوں میں ہر ممکن تعاون کی پیشکش کی،وزیر خارجہ بلاول بھٹو زرداری نے بھی ترک ہم منصب میولت چاواشولو سے رابطہ کیا، وزیر خارجہ بلاول بھٹو نے تعزیت، اظہار یکجہتی کے ساتھ بھرپور مدد کی پیشکش کا اعادہ کیا۔

ترجمان نے کہا کہ وزیراعظم کی ہدایات پر نیشنل ڈیزاسٹر مینجمنٹ اتھارٹی تمام وسائل کو متحرک کر رہی ہے، این ڈی ایم اے خیمے، کمبل، جان بچانے والی دیگر اشیاء ترکی روانہ کر رہا ہے، آفت زدہ علاقوں میں تربیت یافتہ اربن سرچ اینڈ ریسکیو ٹیمیں بمعہ آلات اور ادویات روانہ کی جا رہی ہیں۔

ترجمان دفتر خارجہ نے مزید کہا کہ  انقرہ میں پاکستانی مشن مسلسل متعلقہ ترک حکام سے رابطے میں ہے، پاک، ترک حکام زلزلے سے متاثرہ علاقوں کے لیے کسی بھی اضافی ضرورت کی نشاندہی کر رہے ہیں، پاکستان غیرمعمولی قدرتی آفت کے تناظر میں برادر ترک عوام کے ساتھ یکجہتی کا اظہار کرتا ہے، ترکیہ کو امدادی کاوشوں، بحالی اور تعمیرنو کے مراحل میں بھرپور تعاون فراہم کریں گے۔