پشاور پولیس لائن حملہ  کیس میں نئی پیش رفت ہوئی ہے اور دھماکے میں بھارتی ایجنسی را کے ملوث ہونے کا انکشاف ہوا ہے۔

تفصیلات کے مطابق پشاور پولیس لائن مسجد میں خود کش حملے کی تحقیقات میں پیش رفت ہوئی ہے، تحقیقاتی ٹیم ماسٹر مائنڈ اور فنڈنگ کرنے والی غیر ملکی ایجنسی تک پہنچ گئی۔

ذرائع نے بتایا کہ پولیس لائن مبینہ خودکش حملہ جماعت احرار گروپ نے کیا، منصوبہ بندی اور فنڈنگ دونوں بیرون ملک کی گئیں، حملے کا ماسٹر مائنڈ مکرم عرف سربکف ہے۔

یہ بھی پڑھیں؛ پشاور حملہ آور کی سہولت کار کیساتھ تصویر بول نیوز نے حاصل کرلی

ذرائع کا کہنا ہے کہ پولیس لائن خود کش حملے میں 8 افراد نے سہولت کاری کی، حملے میں استعمال کی گئی موٹر سائیکل 13 بار بیچی گئی، تحقیقاتی ٹیم آخری مالک تک پہنچ چکی ہے۔

واضح رہے کہ پشاورپولیس لائن کی مسجد میں ہونے والے خودکش دھماکے میں جاں بحق افراد کی تعداد 101 ہوگئی ہے جب کہ درجنوں افراد شدید زخمی ہوئے۔