این اے 244 میں ایم کیوایم پاکستان کے رہنما ارشد ووہرا کے کاغذات نامزدگی کو بھی چیلنج کیا گیا۔ 

تفصیلات کے مطابق حلقہ این اے 244 میں الیکشن ٹریبونل نے ارشد ووہرا کے کاغذات نامزدگی منظوری کے خلاف درخواست مسترد کردی۔

الیکشن ٹریبونل کے سربراہ جسٹس آغا فیصل نے درخواست کی سماعت کی۔

ارشد ووہرا کے کاغذات نامزدگی کو مخالف امیدوار رانا ذکی شمسی کی جانب سے چیلنج گئے تھے۔ ارشد ووہرا کے این اے 244 سے کاغذات نامزدگی کو چیلنج کیا گیا تھا۔

درخواست میں کہا گیا کہ ارشد ووہرا دو پارٹیوں کے بیک وقت ممبر ہیں۔ ارشد ووہرا پی ایس پی کے وائس چیئرمین ہیں اور کاغذات نامزدگی ایم کیوایم کے پلیٹ فارم سے جمع کرائے۔

جسٹس آغا فیصل نے کہا کہ کیا ایم کیوایم نے ارشد ووہرا کو ٹکٹ جاری کردیا؟  جس پر وکیل درخواست گزار نے جواب دیا کہ پی ایس پی الیکشن کمیشن میں رجسٹرڈ ہے۔

وکیل درخواست گزار مخالف امیدوار رانا ذکی شمسی نے مؤقف پیش کیا کہ ٹکٹ تو جاری نہیں ہوا مگر کاغذات نامزدگی ایم کیوایم کے پلیٹ فارم سے جمع کرائے گئے ہیں۔

درخواست گزار نے یہ استدعا کی کہ پولیٹیکل پارٹی ایکٹ کی سیکشن 202 اور 203 کے تحت ارشد ووہرا کے کاغذات نامزدگی مسترد کیے جائیں۔

واضح رہے کہ اس سے قبل الیکشن ٹربیونل نے مصطفٰی کمال کے کاغذاتِ نامزدگی کے خلاف درخواست بھی مسترد کردی تھی۔