لاہور ہائی کورٹ نے سینئر رہنما تحریکِ انصاف اعظم سواتی کو عدالت میں پیش کرنے اور میڈیکل بورڈ تشکیل دینے کا حکم دے دیا۔

تفصیلات کے مطابق لاہورہائی کورٹ بہاولپوربنچ میں سینئررہنما تحریکِ انصاف سینیٹراعظم سواتی کی بازیابی کی درخواست پر سماعت ہوئی۔

بہاول پور بنچ نے سینیٹراعظم سواتی اور محمد خان مدنی کو عدالت میں پیش کرنے کا حکم دے دیا۔ کیس کی سماعت جسٹس انوارالحق پنوں نے سماعت کی۔

لاہور ہائی کورٹ کے بہاول پور بنچ نے رہنما پی ٹی آئی اعظم سواتی کےلئے میڈیکل بورڈ تشکیل دینے اورسپرنٹنڈنٹ جیل کو دونوں رہنماؤں کو میڈیکل بورڈ کے سامنے پیش کرنے کا بھی حکم دے دیا۔

درخواست گزارعدیل اسلم کے وکیل ثاقب طارق نے دلائل دیے جس میں انھوں نے مؤقف اختیار کیا کہ اعظم سواتی کو گرفتاری کے بعد لاپتا کردیا گیا۔ امکان ہے کہ انہیں تشدد کا نشانہ بنایا گیا۔

وکیل درخواست گزار نے استدعا کی کہ عدالت اعظم سواتی کی بازیابی اور میڈیکل بورڈ کرانے کا حکم دے۔

تحریک انصاف کے رہنماؤں کی بازیابی کے لیے درخواست

اس سے قبل لاہورہائی کورٹ میں اعجاز چوہدری اور پی ٹی آئی کے دیگررہنماؤں کی بازیابی کے لیے درخواست پرعدالت نے حکومت پنجاب سے رپورٹ طلب کرلی۔

وکیل درخواست گزار کا کہنا ہے کہ حکومت سے رپورٹ طلب کی جائے، خطرہ ہے ان کو نامعلوم افراد میں شامل نہ کر دیا جائے جس پرعدالت نے ریمارکس دیے کہ آپ تو خود گئے گرفتاری دینے۔ آپ گاڑی میں خود جا کربیٹھ گئے۔

وکیل نے کہا کہ انہیں دوسرے ضلعوں میں منتقل کردیا گیا ہے جس پرعدالت نے کہا کہ آپ چاہتے ہیں کہ آپ کو آپ کی مرضی کی جیل میں رکھا جائے۔

وکیل نے کہا کہ آج ہی رپورٹ منگوا کر سماعت کر لیں، عدالت نے کہا کہ آپ کی درخواست کل عدم پیروی پر خارج نہیں کی۔

لاہور ہائی کورٹ نے آئی جی پنجاب سے رپورٹ طلب کرتے ہوئے سماعت 27 فروری تک ملتوی کر دی۔