امین الحق نےکہا ہے کہ سیاسی نظریوں سے بالاتر ہو کر ہم نے مردم شماری کرنی ہے۔

تفصیلات کے مطابق وزیر انفارمیشن ٹیکنالوجی امین الحق نے خود شماری پورٹل کی افتتاحی تقریب سے خطاب کرتے ہوئے کہا کہ آج پاکستان کی تاریخ کا انتہائی اہم دن ہے، اس مردم شماری کا کریڈٹ احسن اقبال کے ساتھ ساتھ اسد عمر کو جاتا ہے۔

انہوں نے کہا کہ ہمارا ہمیشہ مطالبہ رہا مردم شماری منصفانہ اور آزادانہ ہو، اس بار مردم شماری میں وزارت آئی ٹی بھی کردار ادا کر رہی ہے۔

وزیر انفارمیشن ٹیکنالوجی کا کہنا تھا کہ ہم نے 44 وزارتوں اور کابینہ کو ڈیجیٹلائز کیا، اب ہمارا ٹارگٹ ڈیجیٹل مردم شماری ہے جس میں ہم کامیاب ہونگے۔

امین الحق کا یہ بھی کہنا تھا کہ سیاسی نظریوں سے بالاتر ہو کر ہم نے مردم شماری کرنی ہے، اگر ہم نے آگے بڑھنا ہے تو اسکی بنیاد شفاف مردم شماری سے ہی ممکن ہے۔

وزیر انفارمیشن ٹیکنالوجی امین الحق کا مزید کہنا تھا کہ پوری دنیا میں ڈیجیٹلائزیشن بڑھ رہی ہے، ڈیجیٹلائزیشن کیلئے ہم نے تین سال میں 56 ارب کے 70 نئے مصوبے شروع کئے۔