فلپائن کا ایک آئل ٹینکر جو سمندر میں ڈوب گیا تھا کی تلاش جاری ہے، آئل ٹینکر سے رسنے والے تیل سے سمندری حیات کو خطرہ لاحق ہے۔

غیر ملکی میڈیا کی رپورٹس کے مطابق فلپائن کا ’پرنسسز ایمپریس‘ نامی آئل ٹینکر خرابی کے باعث سمندر میں ڈوب گیا، اس ٹینکر پر تقریباً 8 لاکھ لیٹر تیل لدا ہوا تھا۔

فلپائن کے حکام نے صنعتی ایندھن سے لدھے اس ٹینکر کی تلاشی کا کام شروع کر دیا ہے، بتایا جا رہا ہے کہ ٹینکر سے رسنے والے تیل کی وجہ سے مرجان اور سمندری حیات سے مالا مال سمندر کو شدید خطرات لاحق ہو گئے ہیں۔

غیر ملکی میڈیا کی رپورٹس کے مطابق ’پرنسسز ایمپریس‘ نامی آئل ٹینکر منگل کو فلپائن کے دارالحکومت منیلا سے باتان صوبے جا رہا تھا کہ راستے میں انجن کی خرابی کے باعث سمندر میں ڈوب گیا ہے۔

فلپائنی کوسٹ گارڈ نے ابتدائی طور پر اطلاع دی تھی کہ سمندر میں دیکھا جانے والا رسا ہوا تیل صنعتی تیل کے بجائے تباہ شدہ جہاز کے انجنوں کا ڈیزل ایندھن تھا۔

لیکن کوسٹ گارڈ نے جمعرات کو کہا کہ پانی کے نمونوں کے ٹیسٹ سے معلوم ہوا ہے کہ کچھ صنعتی تیل اورینٹل مینڈورو صوبے سے سمندر میں نظر آیا ہے۔

کوسٹ گارڈ نے پہلے کہا تھا کہ بدھ تک یہ پھیلاؤ سمندر میں 24 مربع کلومیٹر تک پھیل چکا تھا، اور یہ معلوم نہیں کہ کتنا ڈیزل ایندھن ہے اور صنعتی ایندھن کے تیل کا کارگو کتنا پانی میں ہے۔

مقامی نیوز سائٹ کے مطابق فلپائنی کوسٹ گارڈ کے ترجمان ریئر ایڈمرل آرمنڈ بالیلو نے کہا کہ ڈوبنے والے آئل ٹینکر کی فٹنس پر سمجھوتہ کیا جا سکتا ہے، لیکن فی الحال کچھ کہنا قبل از وقت ہو گا۔

ریئر ایڈمرل آرمنڈ بالیلو نے مزید کہا کہ آئل ٹینکر کی تلاش جاری ہے اور ہماری پہلی ترجیح جلد از جلد آئل ٹینکر سے رسنے والے تیل کو روکنا ہے تاکہ سمندری حیات کو بچایا جا سکے۔