بنگلہ دیش کرکٹ ٹیم کے کھلاڑی مشفق الرحیم نے ون ڈے کرکٹ میں اپنے ملک کے لیے نئی تاریخ رقم کر دی ہے۔

تفصیلات کے مطابق بنگلہ دیش کے مشفق الرحیم نے آئرلینڈ کے خلاف ون ڈے میچ میں اپنے ملک کے لیے تیز ترین سنچری بنانے کا اعزاز حاصل کر لیا ہے۔

مشفق الرحیم نے آئرلینڈ کے خلاف ہوم سیریز میں سلہٹ کے کرکٹ گراؤنڈ میں صرف 60 گیندوں پر سنچری اسکور کی، میچ میں بنگلہ دیش نے ون ڈے کرکٹ میں 349 کا رنز کا ریکارڈ ٹوٹل بھی بنایا۔

مشفق الرحیم نے شکیب الحسن کا 2009 میں زمبابوے کے خلاف 63 گیندوں پر سنچری بنانے کا ریکارڈ توڑا۔

اس سے قبل بنگلہ دیش کا مجموعی ٹوٹل کا ریکارڈ 8 وکٹوں پر 338 رنز کا تھا۔

واضح رہے کہ چند روز قبل بنگلہ دیش نے ہوم سیریز میں انگلینڈ کے خلاف ٹی ٹوئنٹی میچز کی سیریز میں 3-0 کی تاریخی کامیابی حاصل کی تھی۔

میچ میں نجم الحسین نے 73 اور لٹن داس نے 70 رنز بنائے، اس میچ میں بنگلہ دیش نے آئرلینڈ کے خلاف 183 رنز کے بھاری مارجن سے فتح حاصل کی۔

مشفق الرحیم نے اپنے ساتھی کرکٹر تمیم اقبال اور شکیب الحسن کے بعد تیسرے بنگلہ دیشی کے طور پر ون ڈے میں 7 ہزار رنز بھی مکمل کیے۔