دنیا بھر کی طرح یوم پاکستان برسلز میں بھی پاکستانی سفارت خانے نے ملی جوش و جذبے کے ساتھ منایا۔

تفصیلات کے مطابق برسلز میں پاکستان کا قومی دن سفارت خانہ پاکستان میں ایک پروقار تقریب میں روایتی جذبہ حب الوطنی کے ساتھ منایا گیا۔  قائم مقام سفیر سید فراز حسین زیدی نے قومی ترانہ کی دھن میں قومی پرچم لہرایا۔

اس موقع پر صدر مملکت ڈاکٹر عارف علوی اور وزیر اعظم محمد شہباز شریف کے پیغامات حاضرین کو پڑھ کر سنائے گئے۔

پاکستان کے صدر اور وزیراعظم نے اپنے اپنے پیغامات میں قوم کو مبارکباد دی اور قوم کے بانیوں کی متحرک اور بصیرت انگیز قیادت کو خراج تحسین پیش کیا۔

انہوں نے پاکستان کو ایک مضبوط اور خوشحال ملک بنانے کے لیے بانیوں کے وژن کو عملی جامہ پہنانے کے لیے انتھک کوششیں کرنے کے عزم کا اعادہ کیا۔

اس تقریب میں بیلجیئم کے مختلف شہروں سے کمیونٹی ممبران نے بھرپور شرکت کی.