بھارت اور آسٹریلیا کے درمیان جاری ٹیسٹ سیریز کے تیسرے میچ کے دوران سنیل گواسکر نے بھارتی بیٹسمین کی کلاس لے لی۔

تفصیلات کے مطابق آج بھارت اور آسٹریلیا کے درمیان جاری تیسرے ٹیسٹ کے لیے شبمن گل کو ٹیم کا حصہ بنایا گیا تھا، انہیں آؤٹ آف فارم کے ایل راہول کی جگہ ٹیم میں شامل کی گیا تھا۔

میچ کے دوران شبمن گل نے رن لینے کے دوران رن آؤٹ ہونے سے بچنے کے لیے ڈائیو لگائی جس کی وجہ سے ان کے پیٹ کے نیچے کچھ خراشیں آ گئی۔

شبمن گل نے فوری طور پر فزیو کو گراؤنڈ میں طلب کر لیا، شبمن گل کے اس عمل پر بھارت کے سابق کرکٹر اور کمنٹیٹر سنیل گواسکر نے ناراضی کا اظہار کیا۔

سنیل گواسکر نے دوران کمنٹری شبمن گل کے اس عمل پر تنقید کرتے ہوئے کہا کہ ہم شبمن گل کی مرمت کا تھوڑا سا کام دیکھ رہے ہیں، لیکن انہیں اوور ختم ہونے کا انتظار کرنا چاہیئے تھا۔

سنیل گواسکر کا کہنا تھا کہ بولر کی چار گیندیں ہو چکی تھی شبمن گل نے فزیو کو بلا کر بولر کو سانس لینے کا موقع فراہم کر دیا۔

سنیل گواسکر کے مطابق شبمن گل اسڑائیک پر نہیں تھے وہ نان اسٹرائیک اینڈ پر تھے وہ دو گیندوں کا انتظار کر سکتے تھے یہ ایک سادہ مگر بولر کو تھکا دینے کی تکنیک تھی جسے شبمن نے ضائع کر دیا۔

میچ کے دوران آسٹریلیا کے سابق کھلاڑی میتھیو ہیڈن بھی کمنٹری کر رہے تھے انہوں نے سنیل گواسکر کے تبصرے پر کہا کہ آپ بہت سخت ہیں، جس پر سنیل گواسکر نے کہا کہ ہاں میں ہوں کیونکہ آپ اپنے ملک کے لیے کھیل رہے ہیں۔

واضح رہے کہ اندور شروع ہونے والے تیسرے ٹیسٹ کے پہلے دن لنچ کے بعد کے سیشن میں بھارتی ٹیم آسٹریلیا کی شاندار بولنگ کے نتیجے میں 109 رنز پر ڈھیر ہو گئی تھی۔