سپریم کورٹ نے آئندہ سماعت پر چیئرمین ای او بی آئی کو ذاتی حیثیت میں پیش ہونے کا حکم دے دیا۔

تفصیلات کے مطابق سپریم کورٹ میں ای او بی آئی پراپرٹی کرپشن کیس کی سماعت ہوئی، سماعت کے دوران عدالتِ عظمٰی نے چیئرمین ای او بی آئی کو آئندہ سماعت پرذاتی حیثیت میں پیش ہونے کا حکم دیتے ہوئے سیکریٹری ای او بی آئی اور بورڈ ممبران ای او بی آئی کو جمعرات کو طلب کرلیا۔

چیف جسٹس پاکستان جسٹس عمرعطا بندیال نے کہا کہ ای او بی آئی میں کرپٹ پریکٹس جاری ہے، ای او بی آئی میں کرپشن کی وجہ سے عام لوگ متاثر ہورہے ہیں۔

وکیل ای او بی آئی نے مؤقف پیش کیا کہ دس سال سے ای او بی آئی کے خلاف نیب اور ایف آئی اے کی انکوائریاں چل رہی ہیں جس پرعدالت نے پوچھا کہ ای او بی آئی فیڈرل ادارہ ہے تو چیئرمین کون ہے اور کہاں ہوتے ہیں؟

حکام ای او بی آئی نے بتایا کہ ای او بی آئی میں چیئرمین سیدہ ناہیدہ درانی ہیں اور کراچی میں ہوتی ہیں، چیئرمین ای او بی آئی اور سیکریٹری کے علاوہ 16 بورڈ آف ٹرسٹیز ہیں۔

چیف جسٹس پاکستان نے ہدایت کی کہ آئندہ سماعت پر چیئرمین اور سیکریٹری ای او بی آئی یہاں نہیں آسکتے تو کراچی رجسٹری سے پیش ہوں۔ چئیرمین ای او بی آئی تیاری کر کے آئیں اور تمام معاملات کی تفصیلات سے آگاہ کریں۔

سپریم کورٹ نے ہدایت کی کہ ای او بی آئی اتنا غیر منظم کیوں ہے یہ بھی عدالت کو بتائیں،  ای او بی آئی پراپرٹی معاملات پر تعاون نہیں کررہا ہے، لوگوں کی جائیدادیں لی ہیں تو ای او بی آئی اسے حل کیوں نہیں کررہا ہے۔

سپریم کورٹ نے کیس کی سماعت جمعرات تک ملتوی کردی، چیف جسٹس پاکستان کی سربراہی میں تین رکنی بنچ نے کیس کی سماعت کی۔