صدر مملکت ڈاکٹر عارف علوی اور سابق صوبائی وزیر یاسمین راشد کی مبینہ آڈیو لیک سامنے آگئی۔

تفصیلات کے مطابق آڈیو لیک میں پاکستان تحریک انصاف کی رہنما یاسمین راشد کل زمان پارک کے واقعے سے متعلق بات کرتے ہوئے کہتی ہیں کہ صورتحال بہت خراب ہو گئی ہے جس پر صدر مملکت ڈاکٹر عارف علوی جواب دیتے ہیں کہ جی بالکل۔

یاسمین راشد نے کہا کہ لوگوں نے پٹرول بم پھینکنا شروع کر دیے ہیں، اس سے پہلے خون خرابہ ہو آپ کو کسی سے بات کرنی چاہیے، آپ کو اس معاملے میں مداخلت کرنی چاہیے جس پر عارف علوی نے پوچھا کہ میں سمجھا نہیں آپ کیا کہہ رہی ہیں۔

یاسمین راشد کا کہنا تھا کہ دیکھیں سر اب صورتحال یہ ہے لوگ مرجائیں گے پولیس والے بھی مرجائیں گے، صورتحال اتنی خراب ہوجائے گی کہ الیکشن ملتوی ہوجائیں گے جس پر صدر مملکت نے جواب دیا کہ نہیں نہیں میری بات ہوئی ہے۔

یاسمین راشد نے کہا کہ میں تو جان بوجھ کر پہلی بار باہر بیٹھی ہوئی تھی، اب اس وقت پیٹرول بم چل رہے ہیں،واٹرکینن کوآگ لگ گئی تھی، کیونکہ لوگوں کو بلانا اور یہ سب کیا جارہا ہے۔

صدر عارف علوی نے کہا کہ ٹھیک ہے مجھے اسد سے بات کرنے دیں جس پر یاسمین راشد نے کہا کہ اسد سے میری بات ہوئی  اسد نے کہا ہے آپ نے کچھ نہیں کہنا، آپ شاہ صاحب سےبھی بات کرلیں وہ خان صاحب کیساتھ ہیں، میرا خیال ہے آپ انہیں کہیں کہ خان صاحب آپ خود کو حوالے کریں، اور ہم آگے کے لیے تیار ہوجائیں باقی آپ کی مرضی۔