سعودی عرب نے ماہ رمضان کے مقدس مہینے میں دنیا کے 22 ممالک میں 76 زبانوں پر مشتمل قرآن مجید کے 10 لاکھ نسخے تقسیم کرنے کا فیصلہ کیا ہے۔

تفصیلات کے مطابق سعودی عرب نے دنیا بھر کے مسلمانوں میں قرآن کریم کے 10 لاکھ نسخے تقسیم کرنے کا فیصلہ کیا ہے، قرآن مجید کے یہ نسخے دنیا کی 76 زبانوں پر مشتمل ہوں گے۔

سعودی وزارت اسلامی امور کے وزیر ڈاکٹر عبداللطیف الشیخ کا کہنا ہے کہ سعودی عرب دنیا بھر میں لاکھوں افراد تک قرآن کریم اور اس کا پیغام پہنچانے کے لیے کوشاں ہے۔

ڈاکٹر عبداللطیف الشیخ نے مزید کہا کہ رمضان المبارک کے دوران دنیا کے 22 ممالک میں 76 مختلف زبانوں میں تراجم کیے گئے قرآن مجید کے دس لاکھ نسخے تقسیم کیے جائیں گے.

قرآن مجید کے ان نسخوں کی تقسیم کی منظوری خادم الحرمین الشریفین شاہ سلمان بن عبدالعزیز کی جانب سے دے دی گئی ہے.

قرآن مجید کے یہ نسخے مدینہ منورہ کے کنگ فہد کمپلیکس میں چھاپے جائیں گے اور ان کے ترجمہ شدہ نسخے بھی اسی کمپلیکس میں تیار کئے جائیں گے۔

سعودی عرب کے میڈیا کے مطابق کنگ فہد کمپلیکس میں چھاپے گئے قرآن مجید کے یہ نسخے مخلتف ممالک کے سفارت خانوں کی مدد سے ان کے ملکوں میں تقسیم کیے جائیں گے۔