احتساب عدالت کراچی نے کلفٹن میں سرکاری اراضی کی غیر قانونی الاٹمنٹ کے کیس کا فیصلہ محفوظ کرلیا۔

تفصیلات کے مطابق احتساب عدالت کراچی میں کلفٹن میں سرکاری اراضی کی غیر قانونی الاٹمنٹ کے ریفرنس کی سماعت ہوئی۔

ایم کیو ایم رہنما مصطفی کمال و دیگر ملزمان عدالت میں پیش ہوئے، ریفرنس کے حدود کے تنازع پر ملزموں کی دائر درخواست پر وکلا نے دلائل دیے جس کے بعد عدالت کی جانب سے وکلاء کے دلائل کے بعد فیصلہ محفوظ کرلیاگیا۔

ریفرنس کی مزید سماعت 17 اگست تک کے لیے ملتوی کردی گئی۔ فاروق ایچ نائیک، حسان صابر اور دیگر وکلاء کی جانب سے درخواست پر دلائل دیے گئے۔

ملزمان  کی جانب سے بریت کی درخواست پر بھی وکلاء نےدلائل دیے، وکیل حسان صابر نے کہا کہ  ریفرنس میں کہیں یہ نہیں لکھا کہ مصطفیٰ کمال نے مالی طور پر فائدہ اٹھایا، اس ریفرنس کو بناتے وقت بہت سی کوتاہیاں کی گئی ہیں۔

وکیل نے دلائل دیے جس وقت اس پلاٹ کی الاٹمنٹ ہوئی اس وقت مصطفیٰ کمال مئیر نہیں تھے، میرے موکل کو صرف اس لیے نامزد کیا گیا کیونکہ انکی سیاسی وابستگی ہے، نیب قوانین میں ترمیم کے بعد اب ریفرنس میں ملزموں کے خلاف کوئی خاص گراؤنڈ نہیں اسکو چلانے کا۔

وکیل ملزم نے کہا کہ 1982 میں الاٹمنٹ ہوئی، ہاکرز نے پلاٹ بیچے تو ہاکرز کو ملزم کیوں نہیں بنایا گیا؟ 2004 میں ڈی جے بلڈر کو اراضی منتقل ہوئی، اگر منتقلی غیر قانونی تھی تو کے ڈی اے کے افسران کو ملزم کیوں نہیں بنایا گی؟ اتنے بڑے بڑے معاملات چھوڑ کر نیب کو اس ریفرنس میں اتنی دلچسپی کیوں ہے؟

وکیل مصطفٰی کمال نے کہا کہ 2018 میں ریفرنس دائر ہونے سے پہلے ہی اراضی پرانی حیثیت میں بحال ہوگئی تھی، جب قومی خزانے کا نقصان ہوا ہی نہیں تو ریفرنس کیوں دائر کیا گیا؟

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/latest/2023/08/363579/amp/ کو لائک کریں۔