بھارتی کرکٹ ٹیم کے کپتان روہت شرما نے انٹرویوز میں پاکستان کے کسی بولر کا نام نہ لینے کی وجہ بتادی۔ 

بھارتی کپتان روہت شرما کا ایک انٹرویو سوشل میڈیا پر بہت وائرل ہورہا ہے جس میں ایک صحافی ان سے سوال کرتا ہے کہ آپ کی نظر میں پاکستان کا مشکل ترین بولر کون ہے؟ جس پر ان کی جانب سے دیے گئے جواب میں سب کی ہنسی چھوٹ جاتی ہے۔

بھارتی کپتان نے جواب میں کہا کہ پاکستانی ٹیم میں سب ہی بولر اچھے ہیں، جس پر ان سے کہا گیا کہ کسی ایک کا نام لے لیں۔ روہت شرما نے کہا کہ میں کسی کا نام نہیں لوں گا کیوں کہ کسی کا بھی نام لو تو بہت بڑا تنازع ہو جاتا ہے۔

بعد ازاں روہت شرما نے وضاحت کرتے ہوئے کہا کہ اگر میں کسی ایک پاکستانی بولر کا نام لوں گا تو دوسرے کو اچھا نہیں لگے گا لہذا میں یہ کہوں گا کہ پاکستانی ٹیم میں سب کھلاڑی اچھے ہیں۔

دوسری جانب سوشل میڈیا صارفین کی جانب سے روہت شرما کے اس جواب کو بے حد پسند کیا جارہا ہے تاہم کچھ صارفین نے اپنے رد عمل میں کہا کہ روہت شرما کو مخصوص پاکستانی بولر کا نام لینا چاہیے تھا کہ انہیں کون سا بولر خطرناک لگتا ہے۔