بالی وڈ کی اداکارہ پرینیتی چوپڑا شادی سے پہلے کاروباری دنیا میں قدم رکھنے کے لیے تیار ہیں۔

حال ہی میں اداکارہ نے انسٹاگرام پر اپنا لگژری جیولری برانڈ لانچ کرنے کا اعلان کیا۔

اداکارہ پرینیتی چوپڑا نے اپنے جیولری برانڈ کے لئے کروائے گئے فوٹو شوٹ کی تصویر انسٹاگرام پر پوسٹ کرتے ہوئے جذبات سے بھرا پیغام شیئر کیا۔

اداکارہ نے لکھا کہ ’ گزشتہ کئی برسوں سے، میں انٹرپرینیور بننا چاہتی تھی اور میں یہ دیکھ کر بہت خوش ہوں کہ میرے خواب پورے ہو رہے ہیں۔

انہوں نے لکھا کہ میں تریتیا جیولری کے ہمراہ بطور سرمایہ کار اور پارٹنر اپنے اگلے وینچر کا اعلان کرتے ہوئے بہت پُرجوش ہوں۔

انہوں نے بتایا کہ میرے لیے یہ وینچر صرف زیورات ہی نہیں بلکہ آپ کے لئے دل سے کچھ خاص پیش کرنا ہے۔

انہوں نے بتایا کہ وہ 8 ستمبر کو اپنے لگژری جیولری برانڈ کا افتتاح کرنے کے لئے تیار ہیں۔

واضح رہے کہ چند دنوں بعد 17 ستمبر کو اداکارہ پرینیتی چوپڑا بھارتی سیاست دان راگو چڈھا کے ساتھ راجستھان کے علاقے ادے پور میں نجی تقریب میں رشتہ ازدواج میں منسلک ہوجائیں گی۔