آئی سی سی  نے ٹی ٹوئنٹی ورلڈکپ 2024 کے لیے امریکا کے تین شہر فائنل کرلیے۔

انٹرنیشنل کرکٹ کونسل کی جانب سے جن مقامات کو فائنل کیا گیا ہے ان میں نیویارک، ڈیلاس اور میامی شامل ہیں۔ نیویارک شہر سے 30 میل کی مسافت پر 930 ایکڑ پر پھیلے ہوئے آئزن ہاور پارک میں 34 ہزار نشستوں والا کرکٹ اسٹیڈیم بنایا جائے گا جس کے لیے معاہدہ طے پا گیا ہے۔

خیال رہے کہ تاریخ میں پہلی بار امریکا کسی آئی سی سی ایونٹ کی میزبانی کرنے جارہا ہے۔

دوسری جانب  ڈیلاس میں گرینڈ پریری اور فلوریڈا میں بروورڈ کاؤنٹی لاڈر ہل کے پاس پہلے سے ہی میچز کی میزبانی کے لیے بنیادی ڈھانچہ موجود ہے البتہ آئی سی سی ان دونوں مقامات پر اسٹیڈیم کی گنجائش میں اضافے کے لیے اقدامات کرے گا۔

آئی سی سی کے مطابق  آئندہ ٹی ٹوئنٹی ورلڈکپ گزشتہ 2 سالوں کے ورلڈکپ سے مختلف ہوگا، اس میں 20 ٹیموں کو پہلے راؤنڈ کے لیے 5،5 کے چار گروپوں میں تقسیم کیا جائے گا، پھر ہر گروپ سے ٹاپ ٹو ٹیمیں سپر 8 کے لیے کوالیفائی کریں گی، سپر 8 ٹیموں کو 4،4 کے دو گروپس میں تقسیم کیا جائے گا، ہر گروپ میں پہلی دو ٹیمیں سیمی فائنل میں پہنچیں گی۔