نگران وزیر خارجہ جلیل عباس جیلانی سے برطانوی ارکان پارلیمنٹ کے وفد کی وزارت خارجہ میں ملاقات ہوئی ہے۔

نگران وزیر خارجہ نے مظلوم کشمیری عوام کی حمایت میں آواز اٹھانے پر برطانوی ارکان پارلیمنٹ کو سراہا۔

جلیل عباس جیلانی نے مقبوضہ جموں کشمیر میں انسانی حقوق کی خلاف ورزیوں کو ختم کرنے اور تمام سیاسی قیدیوں کی رہائی کی فوری ضرورت پر زور دیا۔

نگران وزیر خارجہ نے وفد پر زور دیا کہ وہ بھارت کے غیر قانونی زیرقبضہ جموں و کشمیر میں جاری انسانی حقوق کی خلاف ورزیوں کے بارے میں عالمی سطح پر آگاہی بڑھانے کے لیے کوششیں بڑھائے۔

جلیل عباس جیلانی نے کہا کہ بھارت کو مقبوضہ جموں کشمیر میں 5 اگست 2019 کے اپنے غیر قانونی اور یکطرفہ اقدامات کو واپس لے کر بات چیت کے لیے ایک سازگار ماحول پیدا کرنا ہوگا۔

نگران وزیر خارجہ جلیل عباس جیلانی نے پاکستان اور برطانیہ کے مابین دوستی  کو مضبوط بنانے میں دورہ کرنے والے اراکین پارلیمنٹ کے کردار کو بھی سراہا۔

ملاقات میں وفد کے ارکان نے مقبوضہ جموں کشمیر میں انسانی حقوق کی خلاف ورزیوں پر تشویش کا اظہار کیا۔

وفد میں لیبر فرینڈز آف کشمیر کے چئیرمین اینڈریو گیوین، وائس چیئرپرسن لیبر فرینڈز آف کشمیر یو کے ناز شاہ اور آل پارٹی پارلیمانی گروپ کے وائس چئیرمین سام ٹیری شامل تھے۔