پاکستان کے اوپننگ بلے باز عبداللہ شفیق نے گزشتہ روز سری لنکا کے خلاف زبردست سنچری بناکر اپنی ٹیم کو فتح سے ہمکنار کروایا جس کے بعد ان کی 3 سال قبل کی گئی ایک پوسٹ سوشل میڈیا پر وائرل ہوگئی۔

بھارت میں ہونے والے آئی سی سی ورلڈکپ کے آٹھویں اور پاکستان نے اپنے دوسرے میچ میں ہی ورلڈکپ ریکارڈ قائم کردیا۔ سری لنکا نے پہلے بیٹنگ کرتے ہوئے پاکستان کو جیت کے لیے 345 رنز کا ہدف دیا تو جواب میں پاکستان کی ابتدائی دو وکٹیں جلد گرجانے کے بعد ایسا دکھائی دے رہا تھا پاکستان یہ میچ ہارجائے گا۔

تاہم اوپننگ لے باز عبداللہ شفیق نے 103 گیندوں پر 113 بناکر سری لنکا کے خلاف 345 رنز کا بڑا ہدف حاصل کرنے میں ٹیم کو مدد فراہم کی جو ورلڈکپ کی تاریخ میں پاکستان کی جانب سے حاصل کیا گیا سب سے بڑا ہدف ہے۔  عبداللہ شفیق کی شاندار اننگز میں 3 چھکے اور 10 چوکے شامل تھے۔

خیال رہے کہ  عبداللہ شفیق کا ورلڈکپ میں پہلا میچ تھا جس میں انہوں نے سنچری بناکر نہ صرف پاکستانیوں بلکہ بھارتی تجزیہ کاروں سمیت ماہرین کرکٹ سے داد سمیٹی تاہم میچ کے بعد ان کی ایک پرانی پوسٹ سوشل میڈیا پر وائرل ہورہی ہے۔

3 سال قبل عبداللہ شفیق کی جانب سے اپنی ایک تصویر شیئر کی گئی تھی جس میں وہ کاندھے پر بیگ اٹھائے کھڑے ہیں، ساتھ ہی انہوں نے خود کے لیے ایک پیغام بھی لکھا۔

قومی بیٹر نے لکھا تھا ‘ان شاء اللہ ایک دن میں خود کو اپنے اوپر فخر محسوس کرواؤں گا’۔ اس پوسٹ کو ایکس، انسٹاگرام اور فیس بک کے کئی میمز اور دیگر پیجز نے شیئر کیا گیا ہے۔

عبداللہ نے یہ پوسٹ 21 جولائی 2020 کو کی تھی جو اب کرکٹر کی ورلڈکپ ڈیبیو میں شاندار کارکردگی پر وائرل ہوگئی ہے۔

واضح رہے کہ پاکستان نے عبداللہ شفیق اور محمد رضوان کی شاندار سنچریوں کی بدولت ورلڈکپ کی تاریخ میں سب سے بڑا ہدفمکمل کر کے تاریخ رقم کر دی۔