بھارت کے شہر کیرالہ کے ایک کنونشن سینٹر میں یکے بعد دیگرے 3 بم دھماکوں کے نتیجے میں 1 شخص ہلاک جبکہ 56 افراد زخمی ہو گئے۔

بھارتی میڈیا کی رپورٹ کے مطابق کیرالہ کے کالاماسیری میں ایک کنونشن سینٹر میں ہونے والے بم دھماکوں میں کم از کم ایک شخص ہلاک اور 56 زخمی ہو گئے۔ دعائیہ اجتماع شروع ہونے کے چند منٹوں کے اندر کم از کم تین دھماکوں کی اطلاع ملی۔

یہ واقعہ کوچی سے تقریبا 10 کلومیٹر دور کالاماسیری کے مرکز میں یہوواہ کے گواہوں کے کنونشن کے دوران پیش آیا۔ دعائیہ اجتماع میں تقریبا دو ہزار افراد نے شرکت کی۔

کنونشن سینٹر میں موجود لوگوں نے میڈیا کو بتایا کہ پہلا دھماکہ دعائیہ پروگرام کے درمیان ہوا۔ حکام نے بتایا کہ دھماکہ خیز مواد ایک ٹفن باکس کے اندر رکھا گیا تھا۔

کالامسری کے ایم پی ہیبی ایڈن نے بتایا کہ پہلا دھماکہ ہال کے وسط میں ہوا۔ انہوں نے مزید کہا کہ گروپ کے پاس انخلا کا منصوبہ تھا جس نے پہلے دھماکے کے فورا بعد کارروائی شروع کردی۔

پولیس نے بتایا کہ 56 زخمیوں کا ضلع کے مختلف اسپتالوں میں علاج چل رہا ہے جن میں سے 18 افراد آئی سی یو میں ہیں۔ دھماکے میں زخمی ہونے والے چھ افراد کی حالت تشویشناک ہے۔

کیرالہ کے وزیر اعلی پنارائی وجین نے دھماکوں کو بدقسمتی قرار دیا اور کہا کہ صورتحال کو سنجیدگی سے لیا جارہا ہے۔ ریاست کے سبھی سینئر پولیس افسران کو دھماکے کی جگہ پر پہنچنے کی ہدایات دی گئی ہیں۔

ان دھماکوں کی جانچ اب نیشنل انویسٹی گیشن ایجنسی کرے گی۔ ایجنسی کی فرانزک ٹیم پہلے ہی موقع پر پہنچ چکی ہے اور ثبوت جمع کر رہی ہے۔

کیرالہ کی وزیر صحت وینا جارج نے دھماکے کے پیش نظر تمام ہیلتھ کیئر ورکرز کو ڈیوٹی پر آنے کی ہدایت دی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/latest/2023/10/630154/amp/ کو لائک کریں