بھارتی کرکٹ ٹیم کے سابق بلے باز گوتم گمبھیر نے پاکستانی ٹیم کے ساتھ متعصبانہ رویے پر بھارتی تماشائیوں کو آڑے ہاتھوں لے لیا۔

بھارت میں ہونے والے آئی سی سی ورلڈکپ کے لیے بھارتی ٹی وی چینل کے پینلسٹ میں شامل سابق کرکٹر گوتم گمبھیر نے خلیج ٹائمز میں شائع ہونے والے اپنے کالم میں میگا ایونٹ کے دوران بھارتی تماشائیوں کو آڑے ہاتھوں لیا۔

گوتم گمبھیر کا کہنا تھا کہ بھارتی ٹیم کے علاوہ دیگر میچوں کے دوران گراؤنڈ انتہائی کم رہا ہے جس نے مجھے حیرت میں ڈال دیا کہ کیا ہم واقعی اس کھیل سے محبت کرتے ہیں یا ہمیں صرف اپنے کھلاڑیوں کو دیکھنے کا شوق ہے۔

سابق کرکٹر نے بھارتی شائقین کی جانب سے پاکستان سمیت دیگر ٹیموں کے ساتھ روا رکھے جانے والے رویے پر تنقید کرتے ہوئے کہا کہ تماشائیوں نے افغانستان کے کھلاڑی نوین الحق کے ساتھ بدسلوکی کی اور مسلسل اس کے سامنے کوہلی کوہلی کے نعرے لگائے  اور بعد ازاں پاکستان کے خلاف بھارت کے میچ میں ٹاس کے موقع پر بابر اعظم سے بدسلوکی کی جب کہ محمد رضوان پر بھی غیر ضروری نعرے کسے۔

انہوں نے کہا کہ یہ تصور بھی نہیں کیا جا سکتا کہ ایک ایسا معاشرہ جس نے دنیا کو ’پوری دنیا ایک خاندان ہے‘ کا تصور دیا تھا، جو اس رویے سے اس قدر متضاد ہے ۔ ہماری ٹیم بھارت نے اگرچے 3 میں سے 3 میچ جیتے ہیں لیکن مجھے نہیں لگتا ہم نے بطور بھارتی کرکٹ ٹیم سپورٹرز کے دل بھی جیتے ہیں۔

سابق بھارتی کرکٹر نے پاکستان کرکٹ ٹیم کے ڈائریکٹر مکی آرتھر کے بیان کی تائید کی جس میں انہوں نے کہا تھا کہ ایسا نہیں لگتا کہ یہ آئی سی سی ایونٹ ہے۔ گوتم نے کہا کہ احمد آباد میں کمنٹری کے دوران اس طرح کے متعصبانہ رویے کو دیکھ کر مجھے بالکل بھی فخر محسوس نہیں ہو رہا تھا۔

واضح رہے کہ 14 اکتوبر کو پاکستان اور بھارت کے درمیان احمد آباد کے نریندر مودی اسٹیڈیم میں ورلڈکپ کا میچ کھیلا گیا جس میں بھارتی تماشائیوں نے ٹاس کے وقت پاکستانی کپتان بابر اعظم کے خلاف آوازیں کسیں جب کہ محمد رضوان جب آؤٹ ہوکر واپس جارہے تھے تو تماشائیوں نے رضوان کو ‘جے شری رام’ کے نعرے لگاکر غصہ دلانا چاہا۔